هاضت قريحة خاطري يوم لديت=في وارد الجوال ليه عرضها
ابيات جزلات(ن) لها قمت حييت=تحية(ن) للي بيوته نهضها
وعديت في راس الطويله وناديت=وجتني هواجيسي تسابق بعضها
واخذت من جزل البيوت وتنقيت=من هاجس(ن) غير الجزيله رفضها
تستاهل الجزلات ياللي تربيت=على الوفاء والطيب رجلك ركضها
انا اشهد انك فالمراجل ترقيت=يوم الرجال اليوم ربي قرضها
ماقط والله خنت ولآ ترديت=كل العلوم الغانمه محتفضها
ياسعود واللي خالق الخلق والبيت=معزتك فالقلب ربي حفضها
ونعم الخوي في خوته لا تخاويت=تجلآ عن النفس العليله مرضها
ياليتني وياك ياليت ياليت=في ديرة(ن) ياسعود محلآ فيضها
اللي بها ياما وياما تمشيت=طول النظر ربيعها في ريضها
هذي طرآت العمر واللي تمنيت=اللي تنومسني وقلبي نبضها
مليت انا من جلسة البيت مليت=ومن النفوس اللي كثير(ن) بغضها
ومليت من غث العمل كل ماجيت=ناس(ن) ماتعرف سودها من بيضها
والله ماذكر في حياتي تهنيت=والعين سهرانه قليل(ن) غمضها
اكتم همومي داخلي ماتشكيت=لاحد(ن) درا عنها ولاحد(ن) لحضها
هم(ن) بقلبي فتت القلب تفتيت=من قوته لو هي جبال(ن) نفضها
تم الكلام اللي من الراس سويت=من هاجسه محبوكة(ن) ماقترضها
اخــوكـــم / عـبـدالـلـه الـحـــربـــــي