[ناصر عبيد الهواوي]

وصلت شقراء ودكت بي هموم وخاطري ضاق=يارب تلطف بقلبي كل ما دكت همومي
ودخلت قصر الفرح وأضحك لكن البال ما راق=من شاشةٍ تشتغل تعرض قديمات العلوم ِ
بوقت قصير استعاد الذاكره فكري ولا عاق=نفسه بنفسه وشاشتهم ما عاد إلها لزوم ِ
وجلست أقلب بها المدمج ملفاتي والأوراق=مرات أحط النقط وامرار أخليها تعوم ِ
ومن لد يمي يقول اجفون عينك ليش غراق=واقول عندي زكام ومستحي منكم لا أقوم ِ
ياعونة الله تذكرك الولايف يحرق إحراق=ويزين السهر بعيونك ولا تهنا بنوم
يوم المعزب دعانا للعشاء وأصناف الأرزاق=وبعد العشا ساحة الشعار وصفوف القروم ِ
وشغلت الأسود ومن طبعه لمسرى الليل يشتاق=ودقيت زر المكيف عن لواهيب السموم ِ
وعن ملعبتهم سريت وجوها للنفس ما لاق=وحسيت بالجيب حمل من هجوس به تحوم ِ
هاجوس من صاحب المجداف غرق يخته إغراق=طوى شراعه وبدل لبسه بزين الهدوم ِ
النوخذه شاب للمجداف وحبال الشراع القشر ما طاق=قل له لا أشوفك بصاريك بوسط البحر تومي
ود السفن للصعيدي فوقهن للورع طقطاق=جعل الصعيدي إلى شافه لسكرابك يسومِ
وكان إشتراهن عساها بيعةٍ ماهيب تنعاق=يجلب عليها الصعيدي يوم فجل ويوم ثومِ
وإشتر لنا لنش ياباني لموج البحر شقاق=إلى ضرب صدره أمواج البحر راحت قسومِ
و هاجوس دايم يعاودني ويرهق مخي إرهاق=كلمة مرور لملف اللي بعدهم بي ثلوم ِ
وهاجوس تو إنبعث في ملمسٍ جذاب وارقاق=لكن مثل ملمس الأفعى بداخلها سموم ِ
وتال الهواجيس معها القلب يستسلم وينساق= ولو قال وسط البحور الهوج عم حول يعوم ِ
من قبله أنام بدري قبل ما يافلن الأشفاق= والحين أنافس بطول السهر مرقبت النجوم ِ
مرعوب مثل الغليث أللي يروعه ضوح براق=لا شافت أمه خيال أرخت مدامعها سجوم ِ
عن ضيحت البرق حاجبةٍ عليه رواق ورواق=مادريت ان القضيه صاغها كذاب رومي
ابني مقالي وأصوغه في خيالي زين الأوفاق=وراع المثل قال مالصق محال إنه يدوم ِ
كتبت بيدي قصيدي ما أنتحل مانيب بواق= وعلى الرجال الزحول أهل العقول أنحي بلومي
والخاتمه يا عظيم الشان ثبتنا على زينات الأخلاق=على الوفى والرضى والصدق وخيار السلومي