السلام عليكم ...
جديد اليوم .........!
ودوام الحال من المحال ،،،
يوم أقبل ، العيد
ياحالي اللي حال ، يوم أقبل ، العيد = يسرّ عدواني ، ويحزن صديقي
القلب مشقيته ، عطيب اللواهيد = توقد بوسط الجوف وتحرق حريقي
وش حالتي أشرب هماج المواريد = وصافي زلاله ، ما طعمته بريقي
أسهر وغيري بالليالي مراقيد = ما اذوق نوم ، ود مع عيني ، غريقي
طروا عليّ هاك الربع يالأجاويد = ربع ٍ مشوا وقت الرخاء في طريقي
وقت ٍ مضى جوني ،على كل تأكيد = مادمت أنا أغلى صديق ، ورفيقي
يوم ٍ به المطلب يجي مثل ماأريد = من خوفهم أزعل وصدري يضيقي
فجأة لقيت الكل عني غدى بعيد = أقرب ، وهو لاشك ، يفهق ، فهيقي
وكل ٍ يردد كلمة العذر ، ترديد = وما شفت ذاك اللي لوضعي ، شفيقي
وان صار لك حاجة و إلا فيه تنكيد = يروح يومك ،، بين سبّ وزعيقي
عقب السهالة صاربالطبع تشديد = وعقب المحبة شفت بغض ٍ حقيقي
تغيّروا في طبعهم ، صار تجديد = وأنا زماني ،، صار شيء ٍ ،عتيقي
تنكرّوا عهدي و ذ يك المواعيد = واللي مضى ،، ما بيننا في الفريقي
أيام ، كنت أبد دّ المال !! تبد يد = كل ٍ معاهد ني ،، بعهد ٍ ،، وثيقي
ويوم ٍ رماني الوقت من عالي الحيد = تغيّروا ، حتى القريب وشقيقي
ربع الرخاء ياخوك ، قوم ٍ مقاصيد = يلفون للحاجة ،، بهرج ٍ يليقي
وإلى قضوا، ولوّا، جموع وتفاريد = وخلوّك في ضيمك حسير ٍ غليقي
حذراك ، ثم حذراك من هالمقاريد = إ ن كان لك شف ٍ ، بدرب ٍ وفيقي
وطرد المقفيّ ، يوصلك للمناقيد = ما يطرده غير اللي عقله ، طفيقي
ياخوك أنا ، قضيّت عمري تناهيد = ود شيّت بحر ٍ عارف إنه عميقي
ومشيت مع شهب القفار المجاريد = ولقيت فيها الليّ ، لرجلي يعيقي
ياوالله إلا ّ! عايقـتني ، التناكيد = ومالي جداء إلا ّ،عبرتي والشهيقي
دام النياحة للنساء ، والمواليد = وضرب الكفوف ببعضها والصفيقي
عيب ٍعليّ أبكي وأخليّ الحواسيد = تشمت بي وتنعق بوجهي نعيقي