[الطائر المهاجر]

سـود الليـالي ليه تقسي عليّه = ما يكفي اللي من سنين المعـاناة
خلّيني اتهنّـا بعمـري شويّه = دامي لقيت الحبّ فالعمر ما فات
بعض المحبّـه من اله البـريّه = تحيي عظـامٍ ميّته من سنـوات
تبعث أمل في الروح مادام حيّه = حتى ولو موت الفتى بعد ساعات
جتني اماني العمر واحلا هديّه = حـوريّةٍ من فضل رب السماوات
ياشـاريّه قلبـي ترى فيه غيّه = صكّي عليه القفـل لو عشر طقّات
حبس انفرادي وسط روحٍ زكيّه = يفرح بسجنه ما شكى منه ويلات
يسمع تنــاهيدٍ عليّـه خفيّـه = ويرسل اشـاراتٍ بقلبك وخفقات
يامرني اخلص لك بصدق الطويّه = واترك جميع البيض واغليك بالذات
انتي وانا والحبّ حتى المنيّـه = وانتي وانا نجمين فوق المجرات
لكن ترى الغيـره سلاح الخطيّه = لا من بدت فالشكّ يتبع بخطوات
يا ما يفـرّق من قلـوب بريّه = باسباب قيـل وقال من غير اثبات
من جاك ينقل هرج قولي وصيّه = حبٍّ على وضح النقا يوم ما مات