[الطائر المهاجر]

كلما فكرت ليش اكتب قصيــده = كل ليله مثل من شعره يبــاع
وليش أنا منشر من اشعاري العديده = مثل غيري في دواوينٍ تبــاع
أدرك إني مختلف ، روحي عنيده = كل شعري ما يناسب للسمـاع
حيثني والوقت ضد مع ضـديده = ما التقينا يـوم دايم في نـزاع
في زمان لا ضمـير ولا عقيـده = اختفت ذات الاوادم بالخــداع
بعضهم يبغي يحقق ما يريــده = لـو حنى راسه لذيلٍ أو كـراع
وبعضهم يسعى يبي يملك عبيده = من هل الحاجات أو بعض الجياع
مستغل لمركزه ، وبسيف سيـده = يستحل السرق من دم الوجـاع
متخم جيبه ، ويطمح في مزيـده = عايش طول العمر وهم وضياع
ما يخاف الله، ما يذكـر وعيـده = ما درى انه راحل قبل الـوداع
ياهـل التفكير شيلـوها نشيـده = لعنبو وقت غدينـا به ضفـاع
كل حـرفٍ نازنه قبل القصيـده = وكل حسٍ نلبسه ثوب وقنـاع
شعرنا في الحب غيره ما نريـده = كلنا مجنـون ليـلى للنخـاع
هل تبـلد حسّنا صـرنا حديـده = او نعامه تدفن رويسه هـلاع
وقتنـا يحتـاج لعقـول سديـده = تدرك اللي حولها في كل قـاع
تنبّه اللي ما فهم فكـرة زهيـده = ما وطى راسك تحـدّر للكـراع
كلنا في البحر في مركب وحيده = إن قلبها المـوج رحنا للضيـاع