[الطائر المهاجر]

صـوّريني في خيـالك وابعثيهـا للقمر = يشهـد بحبّـي وحبـّك لــو تعاندنا النجـوم
وارسمي الذكرى الجميله فوق امواج البحر= تنشأ مزون السعاده برقها يجلي الهموم
تمطر بـواد المحبّة تروي لظـام الشجر = تثمـر ورود الأماني ما تخاف من السموم
وارسلي طيفك يسلّي طرف اتعبه السهر = عاكف بمحـراب حبّك عن هوى غيرك يصـوم
واسمحي لي لو دقيقة ما على مثلك أمر = اكتبك في وسط قلبي رمز في عال الرجوم
تسمعي آهات ثكلى لـو لمستيها جمر = برديها من حنانك لاتخافي من يلوم
واكتبيني في فـؤادك مثل نقشٍ في حجر = ما أبي تنسين حبّـي وامضي العمـر محـروم
واذكريني يا ملاكي لو يطول بنا دهر = مثلما تذكرك روحي بصحوتي وإلاّ الحلوم
انتي كل الكون عندي وانتي شمسي والقمر = وانتي الدنيا بدونك ما لها عندي لزوم
ويش اسوي يا حبيبي كلمـا جـاني خبر = عن خطيبك عن مصيرك كيف انا مثـلي ينـوم
ادري اهلك ما يبـوني دام خـاواني القهر = ما يبـون إلا الحصـاني ما يبـوا ذيبٍ جـزوم
وما يبـون إلا فـدامٍ جـرّها مـدّ البحر = لـو تمسكن لـو تـذلل بالبحـر تعـرف تعـوم
علّميهـم ، فهّميهـم ، انتهـى كل الصبر = ما لحبـي غيـر صقـرٍ دايمٍ حولي يحوم
قـولي الطير المهـاجر لولا حبي ما هجر= كل هـذا الكـون لاجلي لو تحداه الخصوم