يالله تكفينا الفتن والبلاوي=ومن ضل من شيبان هالوقـــت تهـــديه
البارحه كني بوادٍ سناوي =مدهر ثلاث سنين شدوا شواويه
ما شفت به زيله ولا اوحيت عاوي=موحش ما تسمع ونيسٍ تحاكيه
في حالك الظلما لجنه تصاوي=وقشعه عواصيف الهبايب تدربيه
وفزيت كني من على السطح هاوي= وهجيت من وادي المجانين ما أبيه
وشغلت لي جمسٍ جديدٍ سماوي=من الجميح بغال الاثمان شاريه
واركبت أبو ناصر بعيد الهقاوي=وأرجي عسى الواهب لعوده يخليه
وسلمت له مكتوب ماهوشفاوي=وظرفٍ من أطيب ما طرا لك معبيه
ر يحان مع عنبر ومسكٍ وجاوي=للي كتب قاف القصيده وممليه
طيب لرواد الفطاحل هداوي=وللي سمع والا قرا قافي أهديه
قافك لزينات التماثيا حاوي=لكن سياته تغطي حسانيه
ما به تراحيبٍ ولابه هلاوي=ورحبت أنا بالظرف واللي عطانيه
أبي السلامه عقب ماني رجاوي=من يوم هالشايب يحمي مكاويه
يليق بك يالصيرمي النداوي=تبرك على قلت رفيقك تداويه
مافيه أبو دمغه بحبله يلاوي=ولافيه وشره بالمكاوي تعرقيه
حقه تسهل له عسير الدعاوي=وأدنى الحقوق بما جراله تواسيه
يا من عرف ورعٍ صغيرٍ رحاوي=يتيم لا والد ولا امٍ تربيه
يحفظ على صدره كتاب الطحاوي=ولو قلت كلم بوش سرعه يناديه
عند العرب و الترك قدره غلاوي=شاريه أبو مسعود وإبلير شاريه
وتلقاه في لندن وهجرة مساوي=والورع يفرح والنسا تنهبل فيه