[الطائر المهاجر]

تعوّدت الصبر حتى احكم النفس لاتجزع= على واقع تعيشه يجهله ربعي وخلاني
واداريها واساحرها لعل بواقعي تقنع = فمن دوم الصراحه منهجه بالحق تعباني
مباديي اراعيها واداري العيب لايطلع= ولو اني تحملت الألم ماجابه لساني
اشيل الحمل بعد الحمل ماجضيت او اخنع= واقول ان الصبر طيب واشوفه هد اركاني
تعبت من الزمن كله ولابه بارقٍ يسطع = وهذا كله مقدّر من اللي عالم اشجاني
مشاكل كل حر هالزمن من حالتي وافضع= سبب انه عزيز النفس مايقبل بينهاني
وانا من صغرتي مااركع لغير الله ولا اخضع=رفيع الراس ما اخشى زماني لو تحداني
واذا من الغلط جاني رفيته كنني ما اسمع= واذا من زاد عن حده اجنّب من تبلاني
اشيم نفسي عن لحيه واكرم لحيةٍ ينفع= معاها العذر لو كانت تصنف ضمن عدواني
ودام ان الزمن غيّر نفوسٍ اصبحت تطمع= اذا من شافت الطيّب تناظر له بحقراني
فخيرٍ للفتى يبعد عن اللي للغثا يزرع= يعيش العمر مرتاحٍ بلا همٍ وأحزاني
يطير الحر من ارضه يهاجر بالفضاء الأوسع= يدوّر لحظةٍ فيها السعاده عبر الاوطاني