[الطائر المهاجر]

تعبت اجامل واجل الحسم لسنين = وليتي حسمته يومني في شبابي
مقعدك وحدك بين شم العرانين = اريح لبالك من طراد السرابي
من يزرع بأرضٍ صبخ يلحقه دين = وما يجني الا حنظلٍ للشرابي
ومن تاه دام الشمس فوق الحجاجين = وشلون لا جا الليل والبدر غابي
ومن طاوع لقلبه يخدعه الى حين = ولا من صحى عانى الألم والمصابي
دنيا نراكض خلفها كالمجانين = ولا احد تفكّر في عذاب وحسابي
طموحنا مالٍ وعز ونياشين = ومن ضعف ماله من قريب وصحابي
والمصلحه تحكم بكل الميادين = ومن لا ارتجي به مصلحه كالغرابي
ودامك تعيش بوقت كله ثعابين = فاحفظ لقرشك يرفعك للسحابي
الخلق ما تنفعك لو هم قريبين = من دون قرشك ما تساوي ترابي
محدٍ بهذا الوقت محكوم بالدين = تقول يرفعني اذا الظهر عابي
إلا اذا يعرف وراك الملايين = والا تخلى ما طمع بالثوابي
ترمى مثل غيرك بدار المسنين = ومهما تنادي ما تلاقي جوابي
فالحق على عمرك قبل وقتك الشين = لامن ضعفت وشفت شاربك شابي
قرشك يخدمك ما تبي منّة ادنين = فطرّب لعمرك وانتظر للمآبي