[سناعيس]

العين عيت واجبرت لذة النوم=على التنحي واختفى النوم عنها
والقلب كنه مابقى له ولا يوم=طاير ونبضاته شكا الصدر منها
يالايمي بالعشق ماحد بمعصوم = ليتك تجي وتشوف حي فتنها
المهرة اللي حازها قايد القوم=ذخر لمقبل غزوته واحتضنها
ماحد عسفها نفسها دايم تشوم =تستنكر اللي تلها من رسنها
هافي حشاها كنها رامت الصوم=ولكنها الا فتنة في زمنها
ام الرموش اللي كما الفرس والروم=هي طوعتهم آمره ثم تنها
فيها الجمال اللي من الله مرسوم=وفيها دلال طاغي من حسنها
حاولت ابرر وأدعي انها حلوم=واكذب عيوني وافارق وطنها
واقول هذا ماكتب لي ومقسوم=واضغط على نفس غلاها سكنها
لكن قلبي مارضى شيء معلوم=وباقصى معاليق الشقى هو دفنها
فارقتها وانا على البعد مكلوم=وصرت اتجرع حسرتي مع غبنها
ثم صار طعم الزاد ياكن مسموم=والكبد فيها سن رمح طعنها
والامثل طفل رضيع ومفطوم=ويشوف امه يوم لفوا كفنها
وصلاة ربي عد ماهلت غيوم=واعداد ماتبحر وترسي سفنها
على نبي نذكره دايم الدوم=في كل ركعه من صلاة وسننها