على ذيك الديار الحالمه حطّيت ترحالي = بعد رحله طويله كيف اببداها وباختمها
الى من ذكرت أمريكا الجنوبية بالارسالي= تبادر للذهن ارض البرازيل اومعالمها
"برازيل" الجمال بصورةٍ في البال تبرى لي = بعد خمسة عشر عامٍ من الذكرى اترجمها
وصلها "بدرو الفارس" بعد رحله بالاهوالي= سنة الفٍ وخمسميه من الميلاد هاجمها
بعد مافرّت العالم من اوربا بالاجمالي= نتيجة ما فعله "الموت الاسود" في اوادمها
وصلها البرتغالي/ لو ورد اسمه فلا اشكالي= اظنّه "بدر بن فارس" .. بقايا من مآتمها
بعد طرد العرب من "وندلوسيا" باسوء الحالي= عقب مافرطوا باللي جمعهم في ملاحمها
ثلاث قرون وارض البنّ محتلّه على الخالي= تغير اسمها وكل المناطق في معاجمها
ومن اسم المدينه اسم هالدوله من التالي= وهذا الإسم لاشجارٍ تلاشت من مراسمها
اخذها البرتغال لدارهم من ضمن الاحمالي = وما خلوا بقايا عروق تنبت في مرادمها
برازيل الحضاره بالسياحه مضرب امثالي= شواطيها ، وغاباتٍ ونهرٍ ضخم يقسمها
"ريو" فيها أجمل الشطآن ما يخطر على البالي= تلاقي الناس في "كوكوكبانا" الجو يخدمها
شتاهم عندنا صيفٍ بشمسه اركي دلالي = ولو مرّيتهم بالصيف شفت الناس بانعمها
واذا منك بغيت السحر فاركب متنها العالي= توجّه للشمال ابطايره واربط محازمها
على الغابات تمشي والبحر يمناك طوّالي= "هسيفي" مقصدك "كاريبي" الأمواج يلطمها
هدوءٍ بعد هالزحمه على بحرين وجبالي = ورذاذ ينعش عروقٍ غثيث الوقت يصرمها
وفي كل البلاد الرخص يرفع قيمة ريالي= الى منّك تجنّبت الفنادق في مواسمها
واذا منّك لقيت اليعربي خاطبه نيبالي = ترى بعض العرب بالنصب يسعى في مطاعمها
وخلك ذيب لو شفت المها يمّك بالاقبالي= تجنبها فبعض السم يجري في مقادمها
وعوّد سالمٍ غانم بذكرى تشرح البالي = اذا منّه قرصك الوقت تبحر في طلاسمها