بعض العرب يطلب بدربه تخاويه = يم الربيع اللي بنفسك تمناه
تمشي معه ما تدري اللي يخبيه = وما تعرف اللي يضمره من نواياه
وبالمنتصف ميّل لطعسٍ يداريه = وعوّد عليك وكن شيٍ بمخباه
تنشده وش حصّلت ينفض اياديه = ويعتب عليك ويطلب انك ترضّاه
ويسلك طريق غير دربك ويمشيه= وتواصل المشوار من دون شرواه
حتى تصل ارضٍ بصحرا بها تتيه= ودربٍ مشيته جاه رملٍ وغطاه
والشمس تغرب والمسا في حراويه = وتدور اللي نافع لكل من تاه
البوصله بجوالك اللي توزيه = تنفعك في تعيين دربك ومنهاه
تدور عليه بشنطتك ما تلاقيه = واثره خذ الجوال والبوك خلاه
البوك فاضي غير من كلمة فيه= من يرجي الرحمن ماخاب برجاه
تتوجه لربك وتدعي تناجيه = ينقذك من وضعك وطول المعاناه
وفجأه تشوف لنور منت متحريه= دتسن يسوقه شايب ما تعناه
وقف وقال اركب ترى الاجر مابيه= اجري على اللي يعلم السر واخفاه
ياخذك للدرب الذي كنت تنويه = وينشدك بالحاصل وما كنت تبغاه
ومن يوم سمع اللي حصل من تواليه= قال لك خويك عارفٍ كل ممشاه
حصني لئيم والكذب ما يخليه = لو يظهر التقوى ومخافه من الله
وانته غلطت بلحظه انك تخاويه = ماتعرف لعمر مضى كيف قضّاه
خله على فاله يجي من يربيه = من اقرب قريب له ولو كان يرعاه
ما ينحدر سيل على غير واديه = ولا ينخدع ذيبٍ بحصني بمفلاه