بعد توقف تحركت الشاعريه ، بهذه الكيبوردية ، التي حاولت فيها
معالجة موضوع اجتماعي هام
مانيب رجعي اذا قلت البسي الغطوه = ولا انتي من الغرب يوم انك تخليها
حنا على الدين نمشي خطونا بخطوه = وعلى المبادى دروب الخير نمشيها
ومن يحسب ان التحضر بالغرب قدوه= ماهوب فاهم ولا يدري خوافيها
البنت سلعه تباع وتشترى عنوه = واليا انتهى كرتها محد(ن) يدانيها
في مجتمع ما جمعه الدين والنخوه= كل(ن) لوحده يعاني من بلاويها
البنت تطرد ولو هي ورعة(ن) فلوه= من بيت اهلها تدور من يثبيها
والزوج له صاحبه تأتي على الحروه= وزوجته تمشي لعير(ن) من محبيها
هذا هو الغرب ياللي نايم بغفوه= تبي تحضّر على درب(ن) مشى فيها
وتنسى بأن العرب من اشعل الجذوه= وارسى حضاره جميع الخلق يدريها
حضارة(ن) ما بها شهوات او نزوه= قامت على الدين وارست به مباديها
وسادت جميع البريه تنشر الصحوه = وتحرر الناس من شهوات ترديها
للبنت عز وكرامه ما لها جفوه = محشومة(ن) وين ما تمشي خطاويها
واليوم بنت العرب ماهي على الهقوه= تبي تقلد ولو خسرت بتاليها
تبي تبرج وبعض يخفف الغطوه= عن جهل في البعض ما تدرك تواليها
ما تدري ان الرجل يلقى بها فجوه = لو هي عفيفه ترى يطمع يلاقيها
يمشي وراها ولو هي خيرة النقوه= يكفي يروج اشاعه عند اهاليها