[الطائر المهاجر]

الا يالله عفوك ما ابي جاهٍ ولا اموال= يكفي صحةٍ فيها لو السكّر مخاويني
رفيقي لا عرفت اللي يبي منّي بلا اشكال= انفذ كل ما يامر فلا ودي يعاديني
يقول ابعد عن السكّر ولو حدك عليه الجال= ولو يغريك بانواع الحلا والتمر والتيني
وانا وياه نتطارح سنينٍ ماضيات طوال= واذا منه غلبني بانت آثاره على عيني
وسنوني منه تتراقل مثل ما يرقل الفنجال= بيد عودٍ تعدى بالعمر ميه وعشريني
اعوّد واضبط الحميه واعالج ناتجه ف الحال= فانا من يعرف لنفسه ولابي طب يفتيني
مادام الطب صار اليوم مهنة من غدا دجال= عيونه في جيوب الناس لو يملك ملاييني
فلا من دين يردع بعضهم من زمرة الأنذال= من اللي جاء بقشر العلم من بعض البلاديني
ولا منهو نتاج لجامعاتٍ اغرقت بالمال = وهي اردى من اردى ماعرف بالهند والصيني
تصدر بيضها الفاسد ويلقى مننا اقبال = واذا من مات واحدنا فلا يحتاج تخميني
اجل مكتوب ومقدر ولو هو ناتج الإهمال = فلا تقييم او تحقيق يكشف هالمدانيني
تساوى الطب ويا الدجل في وقتٍ غدا الرجال= اذا منه مرض يلجا لمن نصبه بتلويني
يجرب فيه لين انه يمصه مصة الجوال= اذا من جات فاتورته شاف النصب بالعيني
ويذهب عند دجالٍ يقول اقرا من الأنفال= وهو نصاب ما يحفظ من القرآن سطريني
يحط الناس في صاله وينفث نفثةٍ بإجمال= ومن صابته قال انه مصاب بنظرة العيني
او انه فيه جنيٍ دخل من اسفل السروال= يبي من يخنقه حتى يعاهد يطلع بزيني
او انه فيه سحر وعمل من خدامة البنقال= ويوحي له بإيهامٍ يزيد الصاع صاعيني
بكلام عام يرسخ في الذهن لو هو كلام خبال= واذا منه لقى اللي وصفّه يعطيه الفيني
بقايا شعر وإلا خرقةٍ من سالف الأسمال= وينسى اللي رماها لين دفنت من بعد حيني
وهذا الخوف خلى البعض يحارب بعض لو يحتال= يحط اوراق فيها شخمطة حرفٍ وحرفيني
واسماء من قراباته ولد او بنت وإلا خال= واذا من شافها قال البشر بالسحر ناويني
ومادام الدين صار اليوم عادة من ضميره مال= فلا من وازعٍ يحميه من غزو الشياطيني
ولو كلٍ صدق بالدين ماعانى بأية حال = لأنه مؤمنٍ باللي كتب بين الحجاجيني
وانه مبتلى حتى بصبره يضرب الأمثال= مثل ايوب او يعقوب او كل النبييني
ترى المسلم بلا إيمان من قلبه يجيه هبال= وتجيه امراض ما ينفع بها علاج المداوييني
فخلك دوم من ربك قريب بطيّب الأفعال = بنيه خالصه ترتاح يقينٍ دون تخميني