[الطائر المهاجر]

الرجل لا من كبر كثرت عذاريبه = عند اقرب الناس من خلٍ وعيلاني
إلا إذا هو ثريٍ منتفخ جيبه = يعطي بلا حساب مافكر بنقصاني
أما اذا هو فقيرٍ فعيبته عيبه = لا من ومر او نهى جوبه بحقراني
دامه كذا الحال في وقت ظهر عيبه= فالعاقل اللي يزن امره بميزاني
يبني مبانيه بارض بالعزى صْليبه= تبقى على حالها مع مر الازماني
ويحفظ حلاله ولا يتركه للسيبه = ويعز نفسه بقرشه قبل ينهاني
فالقرش درعك وراه العز والهيبه= لاشانت طبوع من عاملت باحساني
ووطنك من يسعدك لو عشت تغريبه= (فدار بدارٍ وخلان بخلاني)
تلقى اللذي دوم يلقاك بتراحيبه = وتلقى الخدم والحشم اشكال والواني
كل يبي رضاك محد يقول والخيبه= وتصير شيخ وامير عالي الشاني
تقضي بقايا العمر تجني اطاييبه= وتنسى سنين مضت في غم واحزاني
العمر واحد فجدد من تشابيبه = واغنم زمانك قبل يغنمك يالفاني
من قبل يومٍ يضفك في جلابيبه = من ضف قبلك من اعداءٍ وصدقاني
وليّاك تنسى الذي تكتب كتاتيبه = وتحصي فعايلك من زود ونقصاني
وازن امورك بعقل ودين تحمي به = نفسك من الغي لا مالت لطغياني