ارعدي وابرقي ثم امطري ياسحابه = وين شئتي .. نتاجك في تميم محسوب
الله اللي عطاهم كل عزّ ومهابه = ملكهم في جميع الأرض وين الهروب؟
كلٍ شبرٍ بهذا الكون ينطق كتابه = من حروفه تميمي ما محته الخطوب
شرق في غرب والاّ في الجبل أو هضابه= وسط نجد العذيّه او مسار الهبوب
في الحضر والبوادي مثلها ما يشابه= واضحات المعالم في جميع الدروب
الكرم والشجاعه نبضهم له حسابه= بين كل الخلايق يعرفوا في الحروب
هم هل الفكر والاشعار واهل الخطابه= وهم بُناة الحضاره للمعالي وثوب
وهم هل الدين ذادوا عن حماه وركابه= وهم هل العقل والحكمه وطهر القلوب
التميمي شهامه لو تعدد مصابه= ما يفكر بنفسه لا نتخته الكروب
حافظٍ للمبادي ما دنى للخيابه = لو وطته الليالي ما خطى للعيوب
رافع الراس عالي منحنى لاكتسابه = ولا سجد غير للي عالمٍ بالغيوب
عرقه اصلي تعرفه من نقاوة ترابه = من طباعه تعرفه بين كل الشعوب
لا طلع مثل بدرٍ لو يطوّل غيابه = يختفي كل نجمٍ قبل وقت الغروب
امطري ياسحابه لاملام وعتابه = ضامنينٍ نتاجك شرق والاّ جنوب