[الطائر المهاجر]

جتني تشكّى ودمعها فـوق الاوجان = تبيني أرحل عن عجوزٍ وشايب
تقـول انا مقدرعلى العيش يافلان = امّك سبب همي وكل المصايب
والعـود نفسه شينةٍ دوم زعـلان = ما نيب مكلوفه ولـو هم قرايب
قلت العفو يا حبّ يا نور الاعيان = تدرين احبّك وانتي سيد الحبايب
دربك ودربي مثلهم دون نقصـان = في يـوم لزماً دافعين الضرايب
من قدّم الإحسان يجزى بالإحسان = ومن عـقّ شيبانه يلاقي التبايب
يطلـع له اولاد يجـازوه حقران = ولا يسألوا عنه إذا صار عايب
واللي بقلبه لـو قليـلٍ من إيمـان= يعـرف حقـوق لوالدينـه وجايب
الأمر واضح ما عرف فيه قولان = أمرٍ من الرحمن جزل الوهـايب
ومن يعصي الرحمن لاشك خسران= دنيــا ودين وآخـرة باللاهيب
من جابنا يا بنت بالحمـل تعبـان = ومنهو لاجلنا جاء له المـوت لايب
ومنهو لاجلنـا شـايل الهم سهران= ومنهو لاجـلنا شـرب مرّ الشوايب
ومنهو يضحي لاجلنـا دون اثمان = ومنهو لاجلنـا هاجمته النوايب
ومنهو لاجلنـا ذلل النفس أزمـان = ومنهو لاجلنـا احتمـل للتايب
ومنهو جمعني بك بفرحي والاحزان= ومنهو رقص بالعرس وابدى العجايب