ما كتبت الشعـر ابحـث عـن المعجبيـن = لا ولا ني من اللي دايجٍ بكفره
ينظم الشعر طامع في عطاء المحسنين= كل يومٍ بديرة شيخ لو ينهره
يمدح بكذب كوده يكسب الواصلين = ويشتهر في الجرايد لو دفع سمسره
ابدع بشعر اصيلٍ يوقظ النايمين= واردٍ عد من كانوا لنا مفخره
بين حضرٍ وبدوٍ كانوا السابقين = برسم دربٍ نظيفٍ ما علق بغبره
كل واحد يقدّر صاحبه عن يقين = ما تعالى عليه ولا بحث لعثره
وش حدا ما بدا ذا اليوم يالعارفين = نسمع اللي غروره زاد بالثرثره
يحسب الشعر حكرٍ على الضاعنين = منكرٍ للتراث ويحسبه عنتره
الشعر مايعرف التفرقه يالفطين = يخدم اللي يخدمه دام ما يهجره
ومن يحاول يفرق قاصدٍ عن يقين= اشهد انه ولو رجال دوّر مره
يخدم المستفيد بتفرقتنا اجمعين = ولا اتعظ بالعراق ولا درى بخبره
مادرى الجد واحد لو تطول السنين= وكل واحد بدربٍ ربنا يسره
لو رعى البلّ عضده جالس له عوين= يفلح الأرض اويخدمه في متجره
يكفي اللي نشوف بفعلة الشامتين= في قناوات صار الشعر كالهستره
ما تفكر سوى في الكسب لو بعد حين= لو تفرق جموع وتنوي البعثره
وفي النهايه يفوز اللي عطته الثمِين= لو شويعر ترزه رزّة المبخره
دام ينخي القبيله من شمال ويمين= وكل واحد ركض له نيته ينصره
ولودرى بالحقيقه وعرف الخادعين = كان مايوم فكر يدخل المسخره
وفي الفطاحل ندور كل عقل رزين= من رجال بهم نفخر وهم مفخره
ولا ندور خشاشٍ كل شعره رطين = او خذاريف كأس والعهر فجره
ولا ندور لطيعي كل همه يبين = لو على حساب غيره والزمن شهره
فالشعر له رساله من خدمها يقين= يكسب الأجر في الدنيا وفي الآخره