في العالم الثالث دروب ومتاهات = وغابات فيها من صنوف الحصاني
اللي ضميره حي تايه بحسرات= واللي ضميره مات وصل الأماني
قانون غاباته شقوق و ثغرات = ومطاط صالح للنحاف وسماني
ومنهو يجادل طالته بعض شبهات= يقبل ويسكت قبل مايصير جاني
اسرق واحلف والنتيجه براءات= وحقك اذا من وخذ تلقاه ثاني
بالآخره من عند رب السماوات= فاصبر ولو مظلوم ذقت الهواني
مادام ما بك من الحصاني مهارات= مهما تحاول خاسر للرهاني
تحتاج درسٍ ينفعك بعض الاوقات= لعل تاخذ حق من يد جباني
خطوه بخطوه قبل ماتمد خطوات= فتش عن الخادم وتلقى الوماني
تراه يعرف للعمل في الادارات = ويعرف مفاتيح المدير الفلاني
ضبط امورك معه باجمل عبارات= ولا تجيب طاري لبغيتك بالأواني
واشعره انك تخدمه في المجرات= وانك مهم بين انسٍ وجاني
اعزمه لو تخسر مئات الريالات = وكبّر مقامه واشعره بالتفاني
ومن بعد شهرين بروحه وجيات= قل له عن الحاجه بأقصر بياني
تلقاه يركض لك بليا معاناة = وتاصل لحقك فالفضل للصواني