اقبلت تمشي على شط البحـر= مهرةٍ شقرا القمر باوجـانها
تتبـع الأمواج والبحر إن هـدر= تـرفع الفستان عن سيقانها
وان تهـاود أو إذا منّه حسـر= دنقت ، والموت في اكفانها
كامله بالـزين في طرفٍ حـور= درة والــدر من اكنانهـا
لو يقال الحور من ضمن البشر= قلت حوريّـه وذا برهانهـا
مـدري ارقبها أو انظـر للبحر= والشمس تقفي الى حسبانهـا
ماعـرفت الزين يسحر للنظـر= لين شفت السحر في اجفانها
شمس تغرب عارف عندي خبر= وشمس تطلع شاكر لاحسانها
غاطسٍ فكري ، أهوجس بالامر= بين حـلم وعلم في قلبانهـا
اختفت مني مثـل لمح البصـر= واثـرها جنبي وانا ذهلانها
قلت بسم الله وقالت ، لا خطر= مثلك ، انسيّه ، تبي فهمانهـا
ليش تنظر بي عسى مابي كدر= ما لقيـت إلا أنـا باركانهـا
انحرجت وقمت افكـر بالعـذر= ويش اسوي دام صح لسانهـا
قلت عذريني أنا احب البحـر= انشغـل به وتناسى احزانهـا
ارقب الامواج تضرب بالصخر= وانحدار الشمس في غبّانهـا
قالت الامـواج ما تعرف غـدر= مثل غـدر الناس في خلانهـا
البحـر حبّي إذا ضاق الصـدر= اتنـاسى دنيتـي وجنانهـا
فـي حياتـي زاد غمي والكـدر= ما لقيت إنسان يفهم شانهـا
خذت لي واحد بعد طول الصـبر= قـال أحبـك ، حبته ديبانهـا
كنت أحبه موت ، لو يامر أمـر= اندفع للمــوت أو نيرانهـا
كنت احطه وسط قلبي والنظـر= مـالك روحـي بكل اركانهـا
رحت انا وياه في رحـلة سفـر= ندوّر الـراحه بعد فقدانهـا
ثم جينا وفي المطار احلى قـدر= شنطتي فيها البلى باوزانهـا
ملغمه هـيروين ، أندر ما نـدر= انكشف زوجي وخسر رهانها
وابتدا يصرخ مثل بحـر هـدر= ينفي التهمـه ، يبي بطلانهـا
قالوا العب غيرها كشف الأمـر= الرسالة واضحٍ عنـوانهـا
قبــلها ثنتـين زوجـات درر= خذتهن ، ناوي على فعلانـها
بين حلـم وعلم أو مثل الخـبر= انطعن في الروح في وجدانها
انهصر قلبي مثـل عـود انكسر= طعنته صعبٍ عليّ نسيانهـا
بعـدها اقسمت واعطيت النـذر=غير شايب ما أبي إنسانهـا
الـرجل ماكـر ، واذا منه كبر= تقتوي روحه يزيد إيمانهـا
وهي تحكي ، رحت في كان وخبر=عايشٍ باحلام من اشجانهـا
ياحسايف ، كيف ضيعت العمـر=باخسٍ نفسي، جهل باثمانها
من يحصـل مهرة مثل القمـر= تقدّر الشيبان في أزمانهـا
ودقني هوجـاس ينذر بالخطـر= اهمله قلبي ، حلم باحضانها
رفت عيوني ، وشافت من يمـر= طفل عـدّى هامسٍ باذانها
وطمـرت تركض ويلحقها البـزر= ما اشوف إلا غبر سيقانهـا
وشرطي يلحق وراهـا ما قـدر= قلت وش عندك ، تبي لحقانها
قال نصّـابه ، ترى ربك ستـر= انتبـه ياما كثر صحبانها
بعضكـم يكـبر وعقله في صغر= من يشوف الشقرا ضاع بشانها
لو هو مطـوّع إذا سافـر دشـر= جايعٍ ، عطشان ، مع شيطانها
وبعضكم دينـه قـريب للكفـر= لو يصلي ، لو يطوف أركانها
ماخـذ دينـه ستــار للعهـر= ما حسب للموت أو نيرانهـا
مثـل ذولا سوسةٍ تنخـر نخـر= تنشر الأمراض في بلدانهـا