[حرف وشعر]

المشاركة الأصلية كتبت بواسطة الطائر المهاجر

عاهدت نفسي ما اجي للسياسه= واعيش مثل الغير لا اذن ولسان
واكتب شعر فيه الغزل والوناسه = وامدح بليا حدود خايب وتعسان
لكن معي قلبٍ رهيف بحواسه = لا شاف ف الأخبار مايحرك انسان
من كل رجلٍ عارفٍ وين راسه = لا هوب لا ذيلٍ ولاهوب كرعان
ولا هوب من يدفن ضميره بكاسه = ولا هوب راجي خير من تيس او ضان
في وقت صاب العرب بارذل ملاسه= لو شافوا العادي يقولوا بليهان
وقتٍ كشف ما قد خفى من نجاسه= من اتفاق بين غربٍ وعجمان
في تصفية من كان ف العرب ساسه= على الهويه بين عمرٍ وعثمان
يبون وقتٍ فات يرجع بناسه = يوم الغساسن والمناذر لهم شان
تحت امرة العجمان قاموا حراسه= وتحت امرة البيزنط للعرب رعيان
حول الجزيره طوق زادوا مقاسه= من العراق اليا جنوبي لبنان
ثارات مع احقاد باقصى نحاسه = وخوفٍ يجيهم وقت من غير حسبان
يخرج من ارض العرب من قوي باسه= ويكرر اللي صار لفرسٍ ورومان
يومن تهاوت دون حقد وجفاسه = وكلن دخل ف الدين من كل الافنان
احدٍ بصدق وآخرٍ به وجاسه = يظهر نفاق ولا دخل قلبه ايمان
عبادة النيران لبسوا لباسه = حتى من الداخل يهدون الاركان
ويحيون فارس عقب وقت اندراسه = وعلى الخليج يسيطروا دون عدوان
المشكله في من منحهم قداسه = يوم انخدع فيهم ولاهوب فطنان
لا من سمع تصريح فيه الحماسه = بتهديد اسرائيل لاجاء من ايران
ما يدري الطبخه بفكر وكياسه = وانه يؤدي دور مرسوم باتقان
من يوم ما كان الخميني وناسه = ضيفٍ على باريس يدرس للأوزان
على يدين الغرب يزرع غراسه= وعلى يدين الغرب ياصل لطهران
حتى يحكموا للخليج بسلاسه = وما ياصله روسٍ ولا صين والمان
فاللي انكشف هاليوم اكد حداسه= ايران ويا الغرب ف الطبخ اعوان
ولو ما تنبهنا بعقل وفراسه = فما صار في بغداد ياصل لنجران

هنا شعر بمعني الشعر

لافض فوك ولا عاش من يشنوك ولا بكاك اهلوك

بوعبدالله حفظك الله وبارك فيك



تقبل احترامي وتقديري