[الطائر المهاجر]

احدٍ على باريس واحدٍ على جنيف= ينفق بليّا حساب في كل مشوار
ما جابها من كد مثل النداديف = ولا هو بتاجر دايسٍ درب الاخطار
اما بطانه فاسده يسرق الليف = وإلا على الممنوع تاجر وسمسار
وإلا خويدم لا مهابه وتشريف= على فتات العم في ذل واصغار
وإلا وضيع الأصل هيفٍ ولد هيف= في كل مكتب واقف تقل طرار
يطلب تذاكر مدعي انه ضعيف = وإنه مريض وحاجزٍ عند بيطار
ذولا ضياع ويحيوا العمر تزييف = ببلا هويّه لو مشوا كل الاقطار
واحد اذا هبت تجي له على الكيف= لو باع خيشه يكسب القرش دينار
لو هو تفسح ضابطٍ للتكاليف = يصرف بعقل وللفرص دوم سبّار
واحدٍ بقى فالدار من غير تكييف= ماله سوى داره ولو جوها حار
مقرود حظه نايمٍ برد او صيف= مديون واحواله من ادبار بادبار
غزاه فقره لين نتفه تنتيف = ومع كل هذا رافع الراس ما انهار
مثله اصيلٍ شهم في اكرامه الضيف= لو هو تحمل دين ما اعلن اعسار
لكن اذا فكرت من غير تطفيف= تلقى النهايه واحده دون تحتار
منها خلقنا الله واليها مهاديف= في وسط لحد بلحظةٍ دون اشعار
فلا تشغل لبالك وخل التصاريف= للي خلقك وقدر الرزق باقدار
اقنع بمقسومك واذا تاجد رغيف= على معزة نفس يسوى لقنطار
تاكْله مرتاحٍ على غير تكليف= افضل من مفطح تجي بعده امرار
تنام هاني العين ما بك تواجيف= وتصحى على ما نمت حرٍ كالاطيار