[الطائر المهاجر]

اكتبي ياحـروفي من نزيف الجـروح = كود تصحى الضمايرعند بعض البشر
عنـد لاهي وساهي ما اتعض بالفـدوح = ما حمى ارضه وربعه دالهٍ بالـدُلر
وعند خايف وسالي ما فهم في وضوح = ما حسب لليــالي رغم كثر العبر
يحسب إنه مخلـّد ما حسب للنـزوح= يوم يرحل لوحده تاركٍ للقصر
وحييّ اللي ضميره حي في كل بـوح = واتـركي من تأمـرك لو بفكره بهر
قـولي الدين يشكي والعروبه تنـوح = طـال ليـل الحيـارى ما طلع به قمر
كـل امّـه تقـدّم للقمـم بالصروح = وامّتـي بالحضيض وعايشه في الكدر
والسبب وهم عشش من زمان الفتوح = دوم نحكي نـردد ماضيّ(ن) وانـدثر
نـدّعي للتقـدم ونجتهـد بالشروح = ولا صنعنا سلاح يرهب اللي قهر
انكشف ضعفنا مثل الغـزال الجموح= تعرض الفخـذ تغـري كل وحشٍ زأر
ايه بغـداد نفطك يغـري اللي نبـوح = من كـلاب اليهـود ومن رعاة البقر
المصالح تجمّـع كل طـامع شفوح= والمخطط تبيّـن وانكشف ما انستر
بوش حرّق على كيفك جسد دون روح = وانهب اللـي تريـده ما ورانا خبر
دام كلٍ بـدربك ماشي(ن) به سموح = ودايم(ن) تحت أمرك بالخفا والجهر
لكن اعرف ترى من وصل عال السفوح = يـوم يهوي مثل غيره لقاع الحفر
من يظن العقيـدة تنطفي أو تـروح = جاهـلٍ بالنفـوس ولا فهـم للبشر
ومن يظن العـروبة تنتهي والطموح = ما حسب يـوم تنجب صانعين القـدَر
ايه بغـداد صبراً فالشوا لو يفـوح = تنبت الأرض جيل في فعاله فخر
ما يهـاب المنـايا بالشهـاده يلـوح = يـرفع الله أكبـر .. تقهر اللي فجـر