[الطائر المهاجر]

قالت تحبه ، وقلت الحب أضناني = أسهر الين الفجر تظهر تبـاشيره
طيفه معي دايـمٍ(ن) ما يوم خلاني = وان غاب عني تلاقيني تصـاويره
بالحب يمّه ملك روحي ووجداني = وانتم تقولون ..لا، دوّر على غيره
من شان خطه ، ولو يجري بشرياني= الفرق في الدين في سجدة وتكبيره
الحب ما يعترّف بخطوط واللواني= بركان لا من هـدّر يا قـو تدميره
ان كان يرفض أبي ، بالشرع جهلاني= يرغمني آخذ على كيفه وتدبيره
قالت ترفّـق ونا امك ليش زعلاني= هذي سلوم القبـايل ، يالله الخيره
تبي عيـالك يجوا من ساس تعبـاني= يضيع أصلك ونسلك في هل الديره
يمّه وهي أصـلها ما هوب انسـاني= الأصـل يرجع لآدم ، مالنا غيـره
أرجوك شوفي حبيبي نـورالاعيـاني= وتفاهموا بينكم ، تدرين تأثيـره
وجتها الحبيبه ودمـع العين هتّـاني= وقالت وليدك ، وقلبي في تدابيره
قالت أبشرط بشرط واتبعه ثــاني= لعـلّي اعـدل أبونا عن تفاكيره
تزوجينه ، بلا انجاب ، من شــاني= ولبوه شرطه ، قبول دون تأخيره
يبي له اخرى تجيب رجـال شجعـاني= أصلٍ وفصلٍ ، بلا عيبٍ ولا عيره
قالت على شـان حبي أقطـع لسـاني= وارضى شروطٍ قهر قلبي وتحسيره
تم الفـرح عائلي، أهـلي واخـواني = واهل حبيبي بلا اغراب أو جيره
عشنا السعادة مثل طيرين باغصاني= والخوف من حولنا نخشى محاذيره
واصّر أبويه على فرحـه واحـزاني= الا اتجـوّز عليها حسب تقـريره
شاورتها ، قالت الطاعه بالايمـاني= وصيّـة الله بقـرانه وتفسـيره
في ليلة العرس تركض ركض غزلاني= كني اخـوها تهلل في تبـاشيره
وسافرت ويا الجديـدة اسحب ارداني= ورجعت عجلٍ أبي حبي ولا غيره
قالوا توفت بسكته ، قلت انا الجـاني = ما تت قهر من فعالي ويش تكفيره
أبكي عليها ، والعن صعب الازمـاني= والوم نفسي فقلبي انحرق طيره
مستاهل العيش بعده ، وقوة ايمـاني= تجبرني اقبل قضاء ربي وتقديره