بعد مالدنيا تغنج لي على ياليل ياللي = ثم في كسرة عصى تمت تدفعني الضريبه
اعرف ان دنياي هاذي ماتجي لي بالتسلي=ومن على وجه البسيطه ذاق منها ماتجيبه
اسمحو لي باتمنى ياعساها او لعلَي = هي اماني وكل سيلٍ يتحدر من شعيبه
ودي اني دايمً خلف الامام اللي يصلي = ومديٍ كل الفرايض والتهاون ويش ابيبه
ودي ان كل العلوم الطيبه فيني وكلي = وتضرب العربان بي الامثال بافعالي العجيبه
ودي اني كل وقتي بانشراح ومسفهلي = وعندي الخير الكثير ونوب ماجاني مصيبه
والاوامر نظرتي والناس تاتيني بمحلي = وامري مطاعٍ وتنفيذه بطيبٍ لاغصيبه
ودي اغني ولاكن ويش اجيب اويش اخلي =ودي اجمـع كـل زيـنٍ بالقصايـد ثـم اجيـبـه
ودي بقاف الهوى ثم ودي انـي فيـه اعلَـي = بس عمري ماسمح لي كيف اغني ياحبيبه
خايف من هرجة الصاحب وهرجات المغلي = غير قول الناس خربها وهو قد بان شيبه
والخلايق ماتخلي الميتين بكل حلي = كيف بالحيين تاتي بزينهم وايضاً سريبه
ودي وودي وودي ان كل خيرٍ يحصلي = انتبه لي ذي مناوي ماعلى ربي غريبه
استغفر الله ياربي اذا انا قلت زلي = راضيٍ بالًلي قسم لي ربنا علام غيبه
واطلبك يالله تغفر مامضى وايضاَ لمتلي = من ذنوبٍ قبل تحداني بنيرانٍ حطيبه