[الطائر المهاجر]

لا صرت في وقتٍ كثير المذاهب = وكلٍ يقول انه على الحق ف الدين
والبعض يشعل فتنته للمكاسب = اما لشخصه او لبعض الموالين
فخلك بحالك دوم نفسك تحاسب = ولا يجرفك سيلٍ وراه المعادين
مايضعف الإسلام ياكود كاتب = ولاّ رجل دينٍ يدوّر نياشين
فرق تسد منهاج من كان راكب= على حصان الدين يكسب ملايين
ولاّ من اللي طامعٍ ف المناصب = او جاهلٍ والعقل مصدي من سنين
دين التسامح ديننا ف المواجب= ودين الأخوه في جميع الميادين
تاريخنا حاضر ولا هوب غايب = يوم اننا وحده حكمنا إلى الصين
واليوم صرنا اشتات بيدين حاطب= القتل فينا جايزٍ بالقوانين
اسلام يعني ارهاب في حكم راهب= وحاخام طامع في بلاد العريبين
وحنا نتناحر بين شيعي وناصب= وهذا متصوف او اباضي بتعيين
من دون وحده كيف نقدر نواكب= هجمات شرسه من نفوس الحقودين
من اللي لهم ثارات ولهم مآرب = عن موطن الإسلام ماهم بغافين
ارض بها الثروات في كل جانب= والشعب جاهل بالعدا ماعرف مين
مرٍ نقول الغرب للشر جالب = ومرٍ نقول الفرس بالعرب طمعين
وحنا البلا منا غرقنا بقارب= عميان ما ندري عن الشط لا وين
تقاضبوا بالحلق والكل عاتب = وبعصيهم كلٍ تناوش للادنين
والبحر عاصف ما نجا به مراكب= الاّ من اللي وحد الجهد ويعين
وان استمر الحال فالكل ذاهب= والكاسب اللي فرق الناس صفين
الدين واحد لو تزيد المذاهب = والله يحاسب من حرف منهج الدين
كلش ولا التعميم لاقوال كاذب= حدد هدفك ولا تضم البريين
وحكم لعقلك واترك الجهل جانب = فمن لاحكمه العقل يخسر بعد حين