[الطائر المهاجر]

نقض جروح القلب قاف المنيعي = من بعد ماهو ناسيٍ كل ماصار
وقمت اتذكر من رحل من ربيعي= واقرب قريب رحلته اوقدت نار
ابني قبل عضدي بدربٍ سريعي = موت الفجاءه ماعطى اية انذار
لقيت نفسي ذاهلٍ كالصريعي = في وسط لجه كلها هم واكدار
سحابةٍ للحزن تمطر ضريعي = يشوي فؤادٍ كان في يوم جبار
يلجأ لمن من يرتجي ما يضيعي= رب تحكم في الليالي والاقدار
يدري امتحانٍ من تقبل مطيعي= يجزاه بالتثبيت من قبل ينهار
يؤمن بان الموت لو هو مريعي= حكمه من اللي مجريٍ عذب الانهار
يشمل جميع الخلق كهل ورضيعي= ومن لا رحل يرحل من اشرار واخيار
يرحل وحيد ولا معه من تبيعي = ويترك وراه الذكر او شين الاخبار
دنياك يابن آدم خضار وربيعي = ياسرع ما تقلب لشوكٍ وصبار
ودنياك جسر عبور لو هو وسيعي= ياسرع ما ينهار من غير انذار
تعبر إلى حصن الخلود المنيعي = اما إلى الجنه وإما إلى النار
والخاسر اللي في حياته يبيعي = ولا له رصيدٍ ينفعه مثل الابرار
فازرع اذا ودك تحصد الزريعي= في يوم حشرٍ شاخصه فيه الابصار
ولا تتبع التيّار مثل القطيعي = تدور رضاء الشيطان او بعض الاشرار
فمهما تصل له من مقام رفيعي = الموت حولك يقطفك قطف الازهار