انا لي مدةٍ ما يطري الماضي على بالي = ولا فكّرت تال العمر توقظني مناديبه
صحيت بلحظةٍ مثل المسبّه بالخلا الخالي= يدوّر دربه الضايع بتشريقه وتغريبه
لمح برقٍ سرق شوفه بليلٍ ما عرف تالي = كشف له خطوةٍ تاهت توضّح وش عذاريبه
رهيف القلب ما ينطح يشوف الورد بالجالي= على شط النهر يسقيه من عالى مناسيبه
يغار من النحل يمتص ريقه طيب وزلالي = ولو يلسعه ما قاوم كريمٍ في تراحيبه
وإلى من قرّب الشيهان هاج الشوك فالحالي= يبي طرده بعيد وما قبل به أو اساليبه
الا ياطير ياطير الشقى لاتنحر العالي = ترى جنحانك قصارٍ ولا لك قدر أو هيبه
ترفق دام ما تقدر ولو تصبر على الصالي = الين الله يفرجها بأمرٍ من ذرى غيبه
تهب العاصفة نسري وتدفن بوم وكحالي = ولايبقى سوى صقرٍ تعلّى في مراقيبه
هجر ورد الربيع وقهوته ما تعرف الهالي = يعيش بعزته ما دوّر لصافي مشاريبه
فحرالطير ما يرضى يحرك وكره الغالي= بلا رجعه يطير ويتركه للريح تسري به
حبيبي والعمر اقفى ينادي يوم ترحالي= وش اللي جاب لي طاريك يتبعني بتعذيبه
احسبني نستيك واثرك الواقف مع ظلالي= تعدّ النبض في قلبي وتسكت عن لواهيبه
ابي لو تبتعد عنّي فقربك فيه آجالي = قيود الحب تتعبني ولا لي في مطاليبه