[الطائر المهاجر]

قصيدة من حوالي 25-30 سنه

وقف اظنه واجب اني اناجيك= وانصحك ياقلبي بما كان يخفاك
تعبتني ياقلب باسباب ماضيك= واشقيتني بْحاضرك ماظني اقواك
بغيت انا افهم دربك اللي يمشيك= وازريت انا اعرف ما تبيت نواياك
ودي اعرف اللي يكنّه تحديك = وياليتي اعرف لو بعض من خفاياك
منتاب مرتاح ولا شي يرضيك = كنك غريرٍ جاهلٍ وين مسعاك
مر اشوفك ناضج في مراميك= ومر خفيف وراكضٍ خلف مغناك
ومر اشوف الهم بالحيل طاويك = ومر سعيد وطالع السعد بخطاك
ومر تحب ومر تكره محبيك = ومر تود اللي يضرك ويشناك
ياكثر تفكيرك وياكثر طاريك= ويا كثر ما مشيتني درب الاشواك
ما ظن سن الرشد للعقل حاديك= ولا ظن شيب الراس بالخوف يحداك
مدري متى تصحى وتترك غناويك= وترسي على درب يسرك بمفلاك
البيض يسبنك وبالزين تغريك=ياما خذن عقلك على غير إدراك
ليا تغرك ضحكة السن تغويك= وليا تغرك كلمة الحب تسباك
البعض منهن تظهر الحب تغليك= مهوب حبٍ لك اذا تدور رضاك
تاخذ حلالك ثم بالقاع ترميك = وتدور لْدروٍ مشى مثل ممشاك
والبعض لو تصبر فهي دوم تنويك= لا ريّشت تمسك براسك وعلباك
تبعدك عن اهلك ومن كان يرجيك= تملكك مثل العبد لو تخفي شراك
ولا فرخت بفروخها اللي تشقيك= لقيتها غربان بالهم تنعاك
كل يحقرك كلما حل طاريك= يسمع كلام امه وبالنار يصلاك
تعيش باقي العمر همك مخاويك= تتجرع الامرار محدٍ تحاماك
ياقلب يكفي النوم كان انت تبغيك = تامن زمانك قبلما يوم ياطاك
لابد ما تتظر لعيبٍ يرديك= وتبعد عن دروب الهوى قبل تبلاك
واسمع كلامي لاتبيّن شكاويك= شكوى لغير الله مذله ونا افداك
واذا وطاك الدهر والحظ جافيك = لابد ما تصبر على ما تعناك
فكر بصمت ولا يبين الردى فيك= فالناس ما تنظر لهمك وشكواك
الناس تشمت بك ولا ظن تشفيك= فخلك جبل محدٍ يهزك بمرساك
واحفظ لسانك لاتوهق يوديك= دربٍ خطير كلما فيه اشواك
الهرج سم العقل والصمت يعطيك=وقتٍ تخطط فيه لاوين مغزاك