رحلة اسبرانزا الي بوسطن الجزء الثالث بعد ما قعدت إنا و أختي كم يوم في الموتيل قررنا نستقر و ندور لنا على شقة تكون قريبة من المستشفي ، بحيث ممكن أختي تروح للمستشفي مشي على رجليها. طبعاً أفضل مكان للبحث عن الشقق و البيوت هو في الإعلانات الموجودة في الجرائد ، دورنا و دورنا في الإعلانات الين لقينا إعلان عن وجود شقق سكنية في عمارة تبعد حدود 5 دقائق عن المستشفي. اتصلت على إدارة العمارة و أخذت منهم موعد في نفس اليوم. رحت للعمارة بعد ما ضيعت شوي لأنها جوا الحارات ، منطقة العمارة كانت جداً جميلة و منظمة و نظيفة بزيادة بالمقارنة بباقي أجزاء بوسطن ، طبعاً منطقة العمارة كانت في أهم أحيا بوسطون و هو منطقة بروكلان. وصلنا للعمارة و اللي أعجبني فيها إن فيه حارس على كاونتر داخل العمارة و ما يقدر احد يدخل العمارة إلا إذا معه مفتاح أو انه يدق على الشقة اللي هو يبيها و يفتحون له أصحاب الشقة الباب من شقتهم. دقيت الجرس على إدارة العمارة و أعطيتهم اسمي و بعدين فتحو الباب ، دخلنا مكتب الإدارة و قابلنا احد الموظفين و أخذنا على طاولة جانبية و بدا يتكلم لنا عن العمارة و مميزاتها و الأمان اللي فيها ، العمارة كان فيها حدود 200 شقة من مختلف الإحجام و فيها نادي رياضي و مكان لغسيل الملابس و مواقف تحت العمارة و خلفها ، طلبت من الموظف يورينا الشقة اللي كنت طلبتها منه عندما كلمته. أخذنا الموظف للشقة و كانت في الدور الخامس من العمارة (العمارة إذا ماني ناسي كانت 7 ادوار) ، دخلنا الشقة و كانت غرفة وحدة و صالة و حمام و مطبخ ، الشقة ما كان فيها أي أثاث إلا ثلاجة و فرن و مكيف في الغرفة و مكيف ثاني في الصالة ، المكيفات كانت غريبة شوي لأنها ماهي من النوع حق الشباك ولا من نوع السبلت ، كان المكيف جالس على الأرض و الماطور حقه موجود على جدار الشقة من الخارج ، الشقة كانت حليلة بس مو إلي ذاك الحد. سألت عن سعر الشقة و يا ليتني ما سألت لأنه بغا يغمي على من السعر ، سعر الشقة من غير موقف سيارة كان بسعر 1980 دولار أمريكي في الشهر (حوالي 7500 ريال) ، السعر كان جداً خيالي و غالي بالمرة ، قلت للموظف يعطيني فرصة أفكر و ارجع له ، اعطاني الموظف فورمه و طلب مني اعبيها و أجيبها معي إذا كنت ناوي ارجع و استأجر الشقة ، لفت انتباهي في الفورم أنهم حاطين خانة لرقم القرين كارد للي يبي يستأجر الشقة ، انا قلت للموظف إننا محنا أمريكيين و ان أختي طالبة ، فقال لي ان أختك لازم تقدم على بطاقة الإقامة الأمريكية (القرين كارد). طلعنا من العمارة و سألت أختي إذا كانت تعرف شي عن موضوع القرين كارد هذي ، فقالت لي أنها قدمت على البطاقة عن طريق المستشفي و أنهم طلبوا منها تراجع احد مراكز الهجرة في المدينة و انها نست موضوع البطاقة مع الانشغال في الشغل. قررت أدور على احد مراكز الهجرة في المدينة عشان تقدم أختي على البطاقة قبل ما ندور على شقة ، لأنه بدون البطاقة ما نقدر نستأجر شقة ، رجعنا للموتيل و سألت موظف الاستقبال فيه عن اقرب مركز هجرة فوصف لي واحد قريب من الفندق و يتبع لمنطقة ديدهام اللي كنا فيها. رحنا لم مركز الهجرة و كان مكتب صغير فيه شباك واحد و ما كان فيه أي مراجعين سألت الموظفة اللي على الشباك بالمطلوب للحصول على البطاقة فأعطتنا قائمة من الطلبات ، سألت أختي اذا كانت الأوراق المطلوبة معها (كانوا طالبين الخطاب اللي أعطوه لها السفارة الأمريكية للإقامة في أمريكا و صورة من عقدها مع المستشفي و كم ورقة ثانية) ، الأوراق كانت متوفرة مع أختي فعبت الفورمات المطلوبة و أعطيناها للموظفة. طلبت مننا الموظفة ننتظرها حدود 15 دقيقة ، بعد ال 15 دقيقة نادت علينا الموظفة و أعطت أختي ورقة فيها رقم الهوية (القرين كارد) و قالت لنا ان البطاقة بتجينا عبر البريد بعد 10 أيام. (ترا التفاصيل الخاصة باستخراج القرين كارد انا ناسي الكثير منها ، ويمكن يكون اللي انا كتبته غير دقيق) قررنا نروح ندور على شقق ثانية غير الشقة اللي شفناها لأنها كانت جداً غالية و ما تخارج مع راتب أختي اللي تأخذه من الابتعاث (أختي كان يجيها من عملها و من وزارة التعليم العالي حدود 2500 دولار في الشهر) ، دورنا في الجرائد و رحنا لم كم شقق ثانية في المنطقة ، بس كلها كانت أيضا غالية و اللي كان سعرها ارخص شوي من سعر الشقة الأولي كانت بعيده عن الجامعة و الشقق كانت سيئة. قررنا نأخذ الشقة اللي شفناها و كان سعرها 1980 دولار على الأقل بشكل مؤقت الين ما أختي تستقر و تعرف المدينة بشكل أفضل و ممكن تلاقي شقة ارخص من هذي. رجعنا ثاني يوم للعمارة اللي فيها الشقة و أعطينا الإدارة الأوراق اللي طلبوا مننا نعبيها ، و أقنعناهم إن أختي ما معها الان إلا الورقة اللي فيها رقم القرين كارد و إن البطاقة نفسها كانت بتجينا عبر البريد بعد كم يوم. دفعنا اجار شهر واحد للشقة بالإضافة اللي مبلغ 1980 دولار ثاني تامين لإدارة العمارة. استلمنا الشقة و قررنا نروح نشتري أثاث للشقة ، مرينا كم سوق و محل عندهم أثاث جاهز ، بس أختي ما جاز لها الأثاث ، استمرينا في بحثنا الين طحنا على محل كان عندهم أثاث كان جداً حلو بس مشكلته انه يجهز على حسب الطلب و يستغرق تجهيزه حدود شهر ، انا ما أعجبتني فكرة إن إحنا نسكن في الشقة بدون أثاث لمدة شهر ، لكن تحت إصرار أختي دفعنا قيمة الأثاث و اضطررنا ننتظر شهر الين يجينا الأثاث. طلعنا من المحل و رحنا لم سوق يبيع الأجهزة الالكترونية و شرينا منه تلفزيون و جهاز كمبيوتر ، التلفزيون كانت قيمته حدود 300 دولار و الكمبيوتر كانت قيمته حدود 800 دولار. رجعنا للشقة اللي تونا مستأجرينها و ركبت التلفزيون و الكمبيوتر و اتصلت على شركة الكيبل حق التلفزيون المحلية في المدينة و طلبت منهم يركبون لنا كيبل للتلفزيون ( الكيبل هو زى الدش و يجيب قنوات كثيرة) التلفزيون طبعاً يشتغل بدون كيبل بس ما يجيب إلا قنوات قليلة.