جانا رمضان وكل عام له احوال= حنا نتغير والزمن دوم باقي
هذا يجي وآخر عن الدار رحال=وهذا بأمان وذا بيده الوثاقي
وهذاك متخم ماعرف نقص بالمال= وهذا فقير بلقمته في شقاقي
ومن بعد ما كنا شياهين وابطال= نحكم جميع الكون مابه عواقي
اليوم نحيا الخزي في ضعف واذلال= ومن لاقبل به جاه ماجا العراقي
والدين حوصر بين حاقد ومختال= مساجدٍ تغلق واخرى احتراقي
واصبح تجاره ما تبي اي دلال= سلعه رخيصه مالها من مذاقي
كل يوم فتوى تصدر بكل اجلال= مادام ترضي الغرب واهل النفاقي
ممن يبي الدنيا ولا خاف الاهوال= يومه يحاسب عند حشر وتلاقي
يمكن يجينا يوم والصوم بابدال= ماعاد له طاري ولا له بواقي
ويقطّعون الدنيا اوصال واوصال= وحتى الشهاده نطقها به وباقي
والغرب يبني في الكنايس بلا اهمال= واقمار تبشيرٍ علينا سباقي
واسواق يفتحها يبي جلب الاوحال= مابين رقص وعهر والكل ساقي
يعني حلالٍ مايسوي من افعال= ومن يعترض ماله من الظلم واقي
يكيل للجهال من ألف مكيال= ويضحك على اللي يتبعه بانزلاقي
يخدعه بشعارات من زين الاقوال= ولا هوب داري عن جناس وطباقي
مصاص دم وبالمكر دوم ختّال = وحنا نحارب بعضنا باشتياقي
هذا على مذهب به هبال وخبال= وهذاك ملحد يستحق الطراقي
وهذا صفر سبعه وذا بدو رحال= وهذا حضريٍ مايساوي عناقي
مثل التيوس اللي تطاول بالاذيال= والذيب يلغف بعضها ف المتاقي
كل عام وانتم يالمسلمين باذلال= مادامكم خارج حدود النطاقي