بسم الله وبعد :

أخيتي الخيالة كلام سليم ...

أنا بتكلم عن عادتنا حنا .. عادتنا أن المرأة مهرها لها كامل وأي مصاريف أخرى مالها دخل فيه ... والعرس على الرجال يعني الزوج بل حتى لو كان الزواج عائلي فإن الي يجيب الذبايح والي يتقضى لبيت أهل الزوجه هو الزوج يعني البنت وأهلها مايعرفون شيء ...

وتخيلي العرس... وبتجيب ذهب........ وزود على هذا كله بتجيب مهر ........وزود على هذا بتسافر بها تمشيها وبعض الناس يشترط السفر........ شوفي المصاريف ذي كلها على الرجال ..

============================== ============================== ===

أختي الفاضلة ميلاد ...

بالله ابسألك لو كنتي الرجال وبتدفعين كل هذا بالله ماتشيلين الهموم ...

وأما مسألة زيادة المهر وأنه كلها لنا فهذه والله النشبه ... لأني ما أعتقد في شيء يجمل المرأة أكثر من جمال روحها وطيب معشرها والله لو تلبس خياشة بس أنها طيبه مع الرجال وتقدره وتلاطفه وربي وربي وربي أن كان الرجال بما تعنيه الكلمة رجال والله أن يحبها ويموت فيها ولاراح يهمه تلبس فستان 500 كله خيطين لو تصلحه في البيت ماكلف 10 ريال...


يعني الواحد كم بقى في عمره علشان ينتظر ماعاد بقى في العمر شيء والحياة حلاتها وأنت توك صغير وأنا أتكلم عن غيري ...أما أنا شيبت يعني لو افحط الحين ماظنتي اتزوج ماعندي قدره نهائياً حاولت يمين ويسار ماقدرت والحمدالله الي عصمنا لا طحنا في سفر ولا لف ودوران وهذا من الله

ونسيت حاجه ... على فكرة المهر وربي أن المبلغ المتعارف عليه في كثير من العوائل زين ولا فيه نقص وأما الأسعار المبالغ فيها والي تقولينها ياأخت ميلاد هذي موجوده نعم لكن صدقيني أنتم يالحريم لين شفتوا الغالي انهبلتوا ما اقوله بخل لا ..

لكن الحرمه لين جت تتزوج ومعها فلوس قامت تشتري وتطب ماتسمي في أشياء غالية وهي وربي حتى الحلا مافيها حلا أقصد الملابس .. يعني أنا وديت أهلي وقسم بالله تكسر رجلي ما أعجبهم شيء موب لأنه غالي بس لأن مايلقون شيء زين ... وأقولهم الحين هذي ماركات وغاليه بذيك الأقيام ورى ماتتشترون يجاوبوني حنا مايهمنا ماركات حنا يهمنا شيء يكون ذوق يعني شيء حلو ..

بس أخوان النساء حفظهم الله يطبن في الماركات ولا يسمن بالله يحسبنها هي أهم شيء علشان الفشخرة قدام الناس ..

وأما مسألة كل هذا علشان الزوج فهذا موب صحيح ... لأن الزوج مايبي كل هالخرابيط يبي بس ريحة بنت يعني لين شافها ماعاد هامه لاوش لابسه ولا وش اشترت ... لهذا دعوى أنها علشان الزوج ليست صحيحه ..

وصدق الرسول صلى الله عليه وسلم يوم قال ((اكثر النساء بركة ايسرهن مهرا))أو كما قال صلى الله عليه وسلم
يعني لو لاحظنا الأولين وش مهورهم ماهيب شيء وتجد الحرمة تمغط تصير مويه من كبر السن وهي زوجها يحبها ويسولف وياها عايشين مبسوطين

وبعدين في الوقت الحاضر منتشر بين الحريم ربطوه في الشمس يقصدون الرجال ودقوه بالمهر والشروط علشان مايعرس على بنتنا وياكل تبن الزوج وبكرة يزهق يبيعها بتراب يطخ المرة الثانيه ويخلي الأمور تواسى

يعني الرجال مايملكه أحد ولا عليه ضمانه أني لين حطيت عليه مهر خلاص موب طاير ..

لكن الضمانه الوحيده مع الرجال (واتكلم عن الرجال الي ونعم دين وخلق ) هو طيبة المعشر والمرأة الي تخاف الله فيه وتحرص عليه وتحنه وربي وربي أنها يشيلها فوق راسه ..بس وين الي يفهمون ...

==========================

آسف على الإطالة انجرفت في الحديث وأحس فيه باقي كلام كثير بس هذا يكفي خخخخخخخخخ

تحياتي ..