[حسن الشريفي]

دائماً لحظات اللقاء مربكة ..
وهذا ماحصل معي ..
عندما التقينا ..
ولكن ..



الدهشه

مستـغـربه .. كلّ هـ/الدّهـشـه=والرّبكــه اللي .. على مْحيّـاي
وانتي رموشـك .. لها رمـشــه=أنسى .. واضـيّع بهـا دنـيـاي
تـدرين .. وش سـبّة الربـشـه=ووش سـبّة الصمـت في ملقـاي
كـنتي بقلبـي .. على عرشــه =واليـوم اشـوفك هنـا .. ويّـاي
ودّي اسـولف .. ولك وحـشـه=لكن اشـوفك .. يضيـع احْكـاي
عـيني بليــل الشعـر .. عمشـه=وليـلك .. يتـوّه دروب خْـطـاي
ومهما يزيـد المـسـا .. غبـشـه=وجهـك بنـوره .. ضوى ظلمـاي
وانفـاسك العطْـر .. يا غرشــه=فاحت هنـاك .. وهنـا .. جـوّاي
وزيّـنـتي حنّــاك .. بالنّقـشـه=كنّـك تقـولين .. شف حـنّـاي
وآقـول .. لا واللـه البـلـشـه=لا جـت يمـيـنك .. على يمنــاي
فـديت صـوتك .. وهـ/ الرعشـه=حكيـك أغـاني .. وصـوتك نـاي
فـديت عمـرك .. تسعْ طـعـشـه=أرهـن لك اللي مضـى .. والجـاي
لو شافـك اللي .. ربـط عفشـه=ما عـاد سـافـر .. وعـوّد جـاي
ولو شافـك اللي .. حفـظ قرشـه =ضيّـع قروشــه .. ولا له .. راي
ولو شافـك اللي .. على نعـشـه=يفزّ يمـشـي .. مثـل ممـشـاي
و مستغـربه .. كلّ هـ/الدّهـشـه=والرّبكــه اللي .. على مْحيّـاي
واللـه رمـوشك .. لهـا رمـشـه=أنسـى .. واضيّع بهـا دنـيــاي