السلام عليكم ورحمة الله وبركاته
اسعد الله اوقاتكم بكل خير
لتواصل اتمنى لها القبول
((هــبوب الايــام))
الضيقه اللي معي عيـت تفارقنـي=لوسقت الاقدام من ديره إلى ديـره
ماكنها إلا علـى شفـي تسابقنـي=لو كنت مبغى لها خـوه ولا جيـره
الوقت من كاسة الامـرار ذوقنـي=والحظ معثور من حفـره لدحديـره
هـمٍ يغربنـي وهـمٍ يشرقـنـي=وين المراكب رست بي يالله الخيره
لاصار وقتي مضايقني ومرهقنـي=وش خانة الشعر لو كثرت جماهيره
هبوب الايام مثل المـوج تصفقنـي=والقلب ماعوض إبداعي مخاسيـره
اهيم واليا صحيت اشوي يطرقنـي=هبوب ثقل العقل واعيش في حيـره
أنا الذي في يـدي مسلمـه دقنـي=ولا وش ابغى ورا هنده وكشميـره
حسبي على القلب عيا منه يعتقنـي=وقف معه وقفت الفارس على بيره
وين إنت طول غيابك يا مفارقنـي=ارجع وغيرك مابي حبـه وتقديـره
من وين ماوجه الذكـرى تطوقنـي=وجدي على السيره اللي مالها سيره
غلاك في وقتي الماضـي معلقنـي=في كل لليله يعيد الفكـر تصويـره
حاولت بصد لكن قمـت تسرقنـي=ورجعت لك شايلٍ ذنبـك وتكفيـره
صبرت واليوم جيت الصبر عايقنـي=بيتٍ بنيته مايمحى الوقـت تعميـره
لو كان طاريك وسط الصدر يحرقني=حلفت مايسكنه غيـرك ولا غيـره
إن كان قلبك مثل ماأعشقك يعشقني=يفداك من سببـت فرقـاك تدميـره
تعال ماعاد عندي صبـر صدقنـي=لو الخطاء منك من عندي معاذيره
ماعاد به شيء بغيابـك يشوقنـي=إلا صدى صوتك اللي بيح السيـره
ولا عاد به شيء بغيابك يروقنـي=إلا لجا الدمع سيلٍ مـن محاديـره
هذي خلاصة علومـي يامفارقنـي=واليا وصلك الخبر عجـل تباشيـره