ضرسك اذا من اوجعك لابد يومٍ تقلعه= والشر لا منه بدا بالشر لابد تتقيه
تذكير للي ناسيٍ او جاهلٍ في واقعه= يمكن يغيّر موقفه ماله بدربٍ به يتيه
فالحلم ما يوقف اذى من بالأذيه يتبعه= ايشوف في حلمه ضعُفْ لو عن عقل يسكت عليه
الوقت غيّر في النفوس اللي تدوّر مطمعه= سمّ الحضاره وشربت ببلا ضميرٍ ترتجيه
لاصار ما به مصلحه ابنه ترى قد يوجعه= ويمكن يطوله بالأذى في وقت ماهو محتريه
مهما يربي فالزمن من دون يدري يلسعه = ولو هو توقّع وانتبه اوقال ذا ابني سفيه
لا يقول عاقل لو بدا بالهرج دايم يخدعه= يمكن اذا منه كبر يمشي بدربٍ ما يبيه
ان كان يتستر عليه لامن وقع في مخمعه = مثله يقع في غلطته والكل حوله يبتليه
صندوق تفاحه اذا به وحدة ما يمنعه= يرمي بها مادامها خربانه بْريحٍ كريه
ينقذ بقية ما بقى ممن يطيّب مسمعه = ويدري بأنه لو خرب فعله ولاهو مرتضيه
والعاطفه لوتاخذه يخسر بوقت المعمعه = من دون عقلٍ قايده وهو بدربه مقتفيه
ودامه مشى دربٍ عدل بالعقل في كل اوضعه= مايخاف إلا من عليم السر واللي ينتويه