[ماجد الزيد]

اجبّر كسور القلب بالدّمع من عيني =وذا اليوم جفّ او هو عن الكسْر متكبِّر
انا خبرك ايلامن صحْت ناديتني ويني=رجيتك فلا تنادي ويلا اقفيت لا تسبِّر
وفيت و لقيت إن الوفاء ذا الزمن شيني=صبرت و لقيت إنّ الصّبر موت متصبِّر
عطيتك خفوقي ومدّتي مدّة غبيني =عليّ الحرام إن هو رجع عنْه لا دبِّر
لي اعوام وآنا ارجيك يا كامل الزيني=لقيتك ويلا حالك من الحبِّ متغبِّر
ياليتك بيوم الحشر ساعه تراعيني=تحطْ عينك بْعيني وتبكي ونا اعبِّر
عليك الله اكبر كيف تطعن بسكيني=ونا اللي ذخرت الجيش كله لك يْدبِّر
ونا كان منْك الودّ بالبعد يكفيني=هقيتك عزيز النّفس من شيّن تحبِّر
غلاك بْعروقي يا اريش العين ماليني=سترت الهوا عنّ ناس ٍ تموت وتخبِّر
انا ماني بْعاشق مثل جيل الألفيني=اشوف النّقاء في تالي الوقت متثبِّر
خيالك يمرّ وكلّ ما مرّ يكويني =بصدري احس النار واونّ واكبِّر
ضلوعي تكسّر منْك والبين طاويني=تعال اجبر ضلوعي إذا تقدر اتجبِّر
الى شفتك اوّل كنّ يسقى على عيني=وذا اليوم حافر همّ ٍ وهمٍّ يقبِّر