يا نور عينى حياتى منك مخطوره = و الروح باسبابكم دايم معذبها
ما تلطف بخاطري وتقدر شعوره = النار في مهجتي شبت شبايبها
أشقيت حالي معك والحال معذوره = مدري متى نفسي تحقق مطالبها
عزاه يا قلبي اللي ضيّع سروره = و ايامي المحزنه سارت ركايبها
يا رحلة الغادي المتعومسٍ شوره = من رحلتٍ مجهده و البعد تاعبها
في قفر قاحل خلا يبـّاس زهوره = حيضانه اللي بقت جفت مشاربها
ليله سرا والصبح ما بان له نوره = و النجمه البارقه الغيم حاجبها
راع الهوى حالته والله مقهوره = ترميه نفسه و يا مكبر عواقبها
احلامه الغاليه أضغاث مبتوره = و افراحه الغايبه الوقت سالبها
يازين انا حالتي ولله مكسوره = كثرت غرابيلها و انته سبايبها
^^^^^^^^