[احمد الجريفاني]

يا الله تجبر خاطرن مل راعيـه=عاف الهوى وانكر معرفة حبيبـه
عاف الهوى ما عاد يطرب لطاريـه=من عقب ما حظـه تنكـر لطيبـه
والله ما الومه وبي مثل ما فيـه=جرحه مثل جرحي محير طبيبـه
حزن السنين اللي قضيته وانا ارجيه=وهو يراجيني ولا احدن دري به
يشعل بقلبي نار لاقمت اناجيه=وهو يقول الحـظ ربـي حسيبـه
ولاجا يذكرني من الشعر ماضيه=يومه بدا باالحب قبـل ابتـدي بـه :
(اللي يبينـا عيـت النفـس تبغيـه=واللي نبي عيا البخت لا يجيبـه)
اقول له: محد شرا بعد غاليـه=حكم الاله وكل حي(ن) رضي بـه
ما ارتحت يوم وناظري ما يواريه=زولك وقلبـي ذاب بـزرق لهيبـه
كان انت ما قدرت عشقي وانا اخفيه=(مصيبتي يا كبرهـا مـن مصيبـه)
عشقت قلبك يا غلى مـن مراميـه=حتى وفاك بموقفن ينشري بـه
ولا هويتـك للتسـلـي وداعـيـه=لي شيمتن ما يلحقه منـك ريبـه
تعرفني وتعرف ماضن لنا فيـه=مواقفن لا جا الفخر ينحكي بـه
يامن رعى حبن سما في معانيه=دامك حفظت الود ماهـي غريبـه
كم وافين عيت ظروفه تماشيـه=وكم عاشقن حيران ما شق جيبه