[الطائر المهاجر]

بصوت المنشد خازباز

بصوتي

انا اللي تعلم من حياته يصير انسان = عرف للبـداية والنهـايات يرجيها
شرب حلوها والمر من سالف الأزمان = ولقاها سرابٍ تخدع اللي وثق فيها
تعلمت منها أسلى إذا هاجت الأحزان = مدام الحزن ما رجّع اللي أنا اغليها
وتعلمت كيف أصبر على الظلم والعدوان = اسامح بجهدي لكن الراس ما حنيها
وتعلمت أعز النفس والنوم لو جوعان = ولا ذل نفسٍ ربي اللــي مسوّيها
وتعلمت احكم النفس مهما أكن غضبان= اوطّي عليها ثم بالحـلم اداويهـا
وتعلمت أقول الحق لو كنت انا الخسران = خسارة بدنيـا خير من نـارٍ اصليها
وتعلمت إذا اخطيت ابحث عن الغفران = واشيل الحقوق الواجبه ما اعديها
وتعلمت أخاف الله في السر والإعـلان = معي دوم حاضر خالق النفس يدريها
اشوف الخـلايق جامحة كنها القطعان = تسابق بها الدنيا وتجهل مواطيها
تحتهـا خـلايق قبلها كان ياما كان = لهـا شان في الدنيا ولا جيب طاريها
فكلٍ رحل وحـده بلا مـال أو عيلان = الى جنة الفردوس او نـار يصليها
بعضهم ترك ذكر حسن نذكره أحيان = وبعضٍ ترك ذكرى ولا أحدٍ يدانيها
إذا من تبي ذكرٍ حسن فابتـد الإحسان= بقـول وفعـلٍ في الجهرأو بخافيها
تواضع لخلق الله وخلك من الطغيان = فمهما تكن في يـوم لابد تخليهـا
وترى في القناعة كنز من يملكه كسبان = يعيش بسعادة ما تقــدّر مشاريها
ولقيت الحقـد كالنار في داخـل البركان = مريضٍ عليلٍ صاحبه من بـلاويها
فليش الحقد والحسد ياصاحبي الإنسان = تبسّم وسامح لا تقـرّب حـواليها
وصل رحمك المقطوع باخوات أو اخوان = وكل القرايب دونما اثمـان ترجيها
وخلك رحـوم القلب بالعجز والشيبان = وطفـلٍ يتيمٍ منحرم من حلاويها
وخلك صدوقٍ واضح القول بالبرهـان= ترى في المجامل خدعة لزم تمحيها
وابنصحك يالعاقـل تأمل بها الاكـوان = فسبحان منشيها وسبحان منهيها
تمسك بـدين الله ما ينفعك شيطـان = إذا حضّر حسابك وكشفت خوافيها
ترى في صلاتك صحة النفس والابـدان = ونفسٍ بلا إيمـان تكثر مآسيهـا
تعيش الحزن والهم مهزوزة الأركـان = تفتش عن الراحه وتعجز تلاقيهـا