بسم رب البيت نبداء ونبدع بالجواب=في مجاراة الذي محتسب لحسابها
الذي صاغ القوافي على بحر الصواب=يمدح الرحمن في قافيه هو جابها
من عيون الشعر مافي رؤاها مايشاب=اشهد انه صاغها وارتوى زهّابها
واشهد ان المدح لله شامات وطياب =جل رب الكون مالك جميع اقطابها
لااله الا الذي ينشي ثقال السحاب =وانزل الامطار للسايمه واسقى بها
رافعٍ سمك السماء دون عمْد ولا قباب=والنجوم الساريه والكواكب جابها
لااله الا الله الي عطى عبده كتاب = يهدي العالم لجنه وسيعٍ بابها
لااله الا الذي صور الكون المجاب=الحكيم الي يدير الفلك واسرابها
لااله الا الذي نور وجهه بالحجاب = لو بدى من هيبته كل حاجه ذابها
لااله الا الاله الذي صاغ الشهاب = يرجم الشيطان في ليل من هبهابها
لااله الا الذي يرزق انواع الدواب=والبشر والحوت والماشيه باعشابها
لااله الا الله الي تعلى بالحساب =فوق عرشه مالك الملك فوق ارقابها
لااله الا الله الي اليه اولى متاب=يقبل التوبه لمن توبته يلجاء بها
لااله لا الله الحي مهيوب الجناب =الذي يشفي نفوس البشر واعطابها
لااله الا الله الواحد الحق المجاب=الخبير الي علم بالعرب وانسابها
لااله الا الله الي سجد قلبي وناب=له وغيره من سجد نار يتقنى بها
لااله الا الله الي عن الابصار غاب=الذي يبصر عباده ويعرف مابها
لااله الا الله الي جعل يوم الحساب=للخليقه جمع والحق موعدنا بها
لااله الا الله الفرد فرّاج الكراب =فالق الحب والنوى والزكاه انصابها
لااله الا الله الي بعدله كل داب = جاه رزقه واوجد السم بين انيابها
لااله الا الله الي صنع نور وضباب=والقمر والشمس نعمه وهو وهابها
العظيم الموجد الواهب الناس الزهاب=الكريم المنعم البر نور اجوابها
خالق الكون الحكم من عدم دون انتساب=ذاك الاول وهوْ الآخر ومنه ثوابها
جل رب البيت من رحمته طار العقاب=ربنا العلام رب العجم واعرابها
خالق ادم خلق من طين وابليس استهاب=للعباده صورّه واعلمه بارتابها
هازم الاحزاب ناصر عباده بالحراب =اغرق الفرعون يومه طغى واعثى بها
الله الجبار لو قلت في وصفه كتاب =مابلغت النسبه الي العرب ترضى بها
شرّف ابراهيم واحمد على كل النجاب=والشريعه صانها وامتدح كسابها
وانزل الفرقان للناس نور ومستطاب =من تمسك بالذي فيه نال احسابها
بالديار الي لها القلب بين الناس ذاب=والشرف محفوظ بين البشر لانسابها
دار عبدالله عليها من الوالي حجاب = لابة الدين الذي ماخسرحجابها
جيت في بعض المجالس وشاهدت الصخاب=والعفاسي وابن عبده شدو باطيابها
قالوان الي يجاري الفرزدق له جراب =فيه مليونين مادري شنون انشابها
ياجرير اكتب لصاحبك من جزلك وصاب=داموا هل العرف ماكملت باوصابها
ياجرير ان كان لك حظ من عقب الغياب=فادخل الميدان في دايره همنا بها
وانت لولا حاجتك ياجرير ولك عتاب = مادخلت المعمعه بالخلاء واخرابها
ياجرير العمر مره ومثلك له قراب =مايهمك فايت المعرفه واقرابها
عايض القرني تحدى العرب واهل النشاب=ماحسب للناس والقافيه واربابها
قال انا شاعر ومقفول حولي كل باب =والعرب حوله تحزب جميع احزابها
شفت راعي الجيد والي مخضّبة الخضاب=وارمق الي للمعاني تفتّل اشنابها
قلت في نفسي ورى دام نسج القاف طاب=ماتشارك ياولد وانت عندك لابها
جيت للميدان من عقب ماشفت الهضاب=والخيول الصافنه يلتهب مرءأبها
قمت ادقق بالقصيده واناظر بالمصاب = واتفكر في ليالي بكى منصابها
صار بي حيره وغيره وبالقلب انتداب=من كلام الصدق والمعرفه وانجابها
شفت بحر العلم يبني من القاف الخطاب=والنصائح بالقصيده وسيع ارحابها
رائعه من لامس افكارها جاه انتحاب=والعلوم الطيبه ماخسر جلابها
ليت عايض يوم دندن هجا شلة رباب =ماتجاوز منطق العارفه واسبابها
مادرى ان الي يشوفه في الصحراء سراب=وان من صاغ القوافي يرى سكرابها
وان قافيته سرت بين ضرس وبين ناب=وان بن منشار لاصاغها يسلى بها
قافيه بالسجع عندي لها باب وجواب =والمغازي ماكسب كل غمر اسلابها
لو تحدى عايض اليوم ماضاع الشباب=والخيام الي قويه نشد اطنابها
نطحن الحبات فوق الرحاه ومانهاب =والطحين اندققه حيل فوق اصلابها
من بحورن كايده فوقها زاد العباب=والفيافي تنبت الفوق من طريابها
لاخلى ياشيخ وهبته سال لها اللعاب=والمياه الحاليه صبها سكابها
انت عالم بالشريعه ولك بالعلم كاب=وان تاج الدين لباسته يهنى بها
وانت شاعر مير الاطناب صايبها اظطراب=يوم بعض العيس ماطاوعت حلابها
كل فكره فايته ماوفت فيها القصاب=ضاعت الفكره ومانالها طلابها
يعجب الزراع زرعه ويغويه العجاب=كل نفسٍ ضرها يافهيم اعجابها
من رقى في سلّم المجد وش له بالعجاب=والقناعه كنز ماخاب لابس كابها
لك مع المعروف مده ولك جيد وحناب = وانت راعي الفكره الي كسب جوابها
وانت لك ياشيخ نظره وفي الوقت انكراب=والامانه خانها كل من غنى بها
الجشع بالناس زايد وللرشوه شراب = والديار الي مكسر جميع اشرابها
الرباء والعريْ بين الفظائيات صاب =والحضاره ساقت المهزله باورابها
حب للدنياء سكن بالقلوب وشي راب=والفتن من فوقنا مانحس ارزابها
مالنا الا ندعي الحي والدنيا اغتراب =ضاع بيت القدس والرافدين وزابها
يالله احفظ ديننا وامننا بين الضراب=واهدنا للحق واصلح لنا محرابها
وانصر الاسلام واهزم جيوش الانتداب=واجفظ الديره وخيراتها واردابها
واحي نبض العدل بين الصحاري والجداب=واغفر الزلات والذنب وانت ادرى بها
ونجنا من نارك الي بها انواع العذاب=واجعل الجنه لنا دار نتهنى بها
واخر المعنى صلاتي على الشهد الرضاب=الرسول الهاشمي عد مايحيى بها
خاتم الرسلْ الكرام الذي وفى النصاب =يوم في بدر الكرامه رفع ميزابها
راعي السيره الشريفه محمد بالمآب = الشفيع الي له المعرفه وابوابها