ودعتك الله حبيبٍ كان في الماضي= اغلا المخاليق في دنياي من طيبه
غيّرك وقتك غديت الخصم والقاضي=تحكم بهجري بفعل الكذب والغيبه
ما نيب بالحكم لا قانع ولا راضي= بالظلم ما ارضى ولا لي في مشاريبه
وش ذنب قلبي يعاني القهر واللاضي= وش مكسبك تحرق القلب بلواهيبه
الحب ماهو "أحبّك" بسّ بالفاضي= كلمه وتشطب لبعض الشك والريبه
الحب حسٍّ غريبٍ كلما هاضي = يجعلك تايه بهذا الكون تغريبه
حتى تلاقي حبيبٍ يشفي الناضي= في شوفته في كلامه في اعاجيبه
وش فايده حب والمحبوب باعراضي= ما حسّ قلبك ولا قام بمواجيبه
مادام قلبك قوى الهجران وابغاضي= قلبي رفض يكرهك لو زدت تعذيبه
علمتني الحب لو تسمح بإقراضي = بعض المهارات في كرهك واساليبه