[عبدالله الشويمان]

المشاركة الأصلية كتبت بواسطة حي الضمير

متى على الله تنتهي عطلة الصيف=ولاعادها الله من اجازه طويله
فيها تباعد شمل الاحباب ياحيف=ومعها غدت نجد العذيه مليله
اللي رحل يم الخبر واللي لطريف=واللي على مكه يريد الفضيله
حتى الضنا سافر مع امه على الريف=والبيت من دون الضنا مانجيله
والجار قدله عشرة ايام ماشيف=وحتى الجماعه فالمصلى قليله
وحتى رفيقي فالسفر ماجد السيف=الصاحب اللي ماندور بديله
اللي يسلي خاطري بالسواليف=سافر على الدمام من كم ليله
ومن دونهم يانجد لاطعم لاكيف=طعم القهاوي مفوحً دون هيله
ماكني الا المغترب في رحى جنيف=وحيد عايش دون ربع وقبيله
اقضي نهاري بالعمل وسط الارشيف=والليل مابه غير قافً نشيله
هم الزمان وهم فرقى المواليف=تجبر قوي العزم ينهد حيله
ومتى على الله تنتهي عطلة الصيف=ولاعادها الله من اجازه طويله

الاخ حي الضمير

صح السانك ملايين على هذا النص الفاخر..

وهذي الدنيا ونخوك..تجمع وتفرق..

الله يلم شمل الاحبه على خير.

اكرر صح السانك يالقرم

دمت بخير وصحه وسلامه.