ابيك ميه لاشربتك ترويّت=ماابيك مثل البحر ملحٍ أجاجي
ابيك مثل الشهد لاذقتك اشفيت=ماابيك علقم يعتصر داخل ادواجي
ابيك ظلي لاتريّحت واغفيت=ماابيك شمسٍ زايده بالوهاجي
ابيك تسأل لاتغيبت وابطيت=ماابيك تدري غير يوم اني آجي
ابيك تحمل خطوتي لاتعنيّت=ماابيك غزوة زيد يوم العجاجي
ابيك توفي يالوعد لانك اعطيت=ماابيك عن وعدك اتروغ وتجاجي
ابيك خاتم باصبعي لاتوريت=ماابيك خنجر يطعن الخصر بناجي
ابيك في عفه وحشمه وتسميت=ماابيك تقلبها مزاح وغناجي
هذي الخصال اللي على شانها حبيت=وملعون ابو حبٍ يعكر مزاجي
هذي شروطي كان فيها تراضيت=والا انتظر وتجيك دعوة زواجي