[حمود جارالله المزيني]

ياهل المنتدى ناموا لعلـّي أنام = كل ماشفتكم واعين جـدّ السهر
ليلةٍ ماجرت لي هاج فيها الغرام = والله انّه بليله بس يكفي شهر
جاني العلم من بعد العـِـشا ثم هام = قلبي وصرت مثل اللّي يصارع بحر
قالوا انـّه يبي ينشاف بدر التمام = قلت واويل عيني كيف تقدر نظر
قال مرسولهم : يلقي عليك السلام = جيـّته بعـْـد يوم وسهـْـرته للفجر
قلت : وشلون .. قالوا : خذ وكاد الكلام = كل دنياك تجري فوق كف القدر
قلت : انا بي جروحٍ واصله للعظام = كان ريحانهم ذعذع لحقني خطر
قالوا : انت بخطر من يوم وصفك غلام = كيف خفت المنايا يوم حان الكبر
قلت : ويش الذي جابه ووين المقام = قالوا : انه يبي يرقص بهاك القصر
ثم رابت عظامي مثل من فيه زام = سم دابٍ بنيبانه لدغـْه وفغـر
قلت : ياليتكم عنـّي كميتوا حرام = كيف تكوون قلبي لين ولـّع جمر
قالوا : انت الموصـّي كل عام وعام = لو كمينا تلوم ومايفيدك عذر
قلت : هم يذكروني ؟ قال لي : ياسلام = مثلك ايضا يوصـّي عنـْك يطلب ذكـِر
قلت : راحت سنيني مع سنينه احطام = كان عديتها عشرين ماهن عشر
قال : عطنا القصيد صويحبك له مرام = قلت : مافيه شي .. وقال : لو هي سطر
آه واويل حالي طير بلواي حام = هـدّ له هـدّةٍ خلت قليبي نثـر
احسب ان الهوى لاطال يرجع رمام = لكن الغصن لو يـيبس يعـّود خضر
ويش اسويّ ونار الشوق تضرم ضرام = شبّ كل الحشا من حيرتي واستعر
حيلتي قافٍ اهوج مالنظمه نظام = لاتلومون قافي كان صابه كسر
آتنهد وهذي حال من هو يضام = تقصـِـر اليدّ منـّه مع قصور البصر
والحكايه قديمه له بقلبي وشام = الصبا والصبايا ( حب ) باول عمر
يوم بعـْـض العذارى مرةٍ له لثام = واكثر الوقت تبلج بالنحـر والثغر
حب عذري نحسبه مع مرور الكرام = مرنا .. مادرينا انه ترك له أثر
أي اثر ؟ والله انه حط مثل الختام = بالضماير نقشها مثل نقش الحجر
راح ليل ( المزيني ) لين شق الظلام = مايحسـّب لطول الليل كاتب شعر
مايسوغ السكات ولايطيب المنام = المطيه قوافي والفيافي سهر