لاشك ان كل اب مكلف برساله تجاه ابنائه واحسب انني مثل غيري اجتهدت لتحقيق تلك الرساله لكن تحقيقها كان له وقع مختلف وثقل و ضيق على النفس حيث غادروا عشهم
دفعة واحده وبأوقات متقاربه فالكبير تزوج واستقل بسكنه والذي يليه التحق للدراسه بالامن العام وثالثة الاثافي اللابن الذي يليه غادرنا هذه الليله هوواخته مبتعثين للدراسه في كندا مما ولّد في نفسي شيء من الضيق لفقدهم رغم فرحي بذلك فكتبت تلك القصيده .
ياسعود من عشهـا طـارت عصافيـري=من عشها هاجـرت فجـأه علـى غـره
متعود(ن)كـل صبـح اشبـع نواظيـري=وأشحنهـم بعاطفـة حبـي الـى بكـره
كانت فروخ(ن)صغيـره مالهـا غيـري=ونبت لها ريش فجـأه وأصبحـت حـره
وطارت واناآصيح(حلّـق بالسما)طيـري=مبسـوط ألّـوح لهـم ياسعـود بالغتـره
وفكرت وفكـرت ليـن انشـل تفكيـري=وصبر ت مثل الذي واطي علـى جمـره
اليوم صـارت حقيقـه كـل اساطيـري=وودعتّهـم ظاحكـا ومخّفـي الحـسـره
ماحد(ن)يحـس بعنـاي وشـدّ تأثـيـري=وأظحـك واناالنفـس تعبانـه ومنكسـره
ماادري ردى حظ أو مـن سـؤ تدبيـري=او ان لله حكمـه ونرتـضـي بـامـره
وآقـول هـاذي مـن المولىمقـاديـري=الله بهـم منّـي اولـى خالـق الــذره
وعنـد المـوادع تلعثمـت بتعابـيـري=ويقول لـي سعود(هـاذا عاقـل المـره)
ومن شافني وشاف في وجهي اساريـري=يتـذكـر الله يـقــول الله لايـضــره
مايدري وش جـواي خلّـف أعاصيـري=لو شاف حجم الدمـار آيقـول ياصبـره
اربع عصافير طـارت وآعسـى خيـري=عن اللحى أصبر . وكيف أصبر عن الغره
لهـا معّـزه خصوصـيـه وتقـديـري=من زمزم الطهـر فيهـا لكـل معتمـره
أربع غـرف صامتـه تبكـي مناعيـري=ولو جيت وشفت السرر آموت بالحسـره
ولو شفت باقي ملابسهـم وش يصيـري=ماضن لـي فـي بقايـا عيشتـي قـدره
أبعتـذر يارفيقـة عـمـري وسـيـري=ماصعد درجكـم لحتـى تنشـف العبـره
وياحظ ماادري متى تخلـص عواثيـري=ايـلا تجـاوزت عثـره جيتنـي بعثـره
ويا وقت مافيه يعنـي اي احـد غيـري=ياوقت وقّـف معـي لـو بالعمـر مـره
مع عاديـات الزمـن طالـت مشاويـري=لو صابني صاب غيـري أنتهـى أمـره
وياقلـب ماعـاد لـي عنـدك معاذيـري=عليـك طوّلتهـا وبـي سـو ماتـكـره
يكفي صمودك معي في شـرّي وخيـري=واليوم فـي حـل مـاوالله عليـك أشـره