قصيدة-- ورد=
بيني وبين الشاعر =
معجب الضعيني=
---------------------=
قال معجب=
---------------------=
وحالي اللي كل ماقلت زانت =لابد ما يظهر بها شيء ياحمود
وان قلت هونها المهون وهانت=يابوعلي يوقد على النار مقرود
وشابت لحانا والعذاريب بانت=واليوم أشوف الحال نقص بلازود
وقرب النظر واعظام الأقدام لانت=وقمت أقسم الخطوة على الرجل والعود
والنفس من كثر الهواجيس عانت=وياما سهرت الليل والعالم ارقود
شفت النخيل اللي جذوعه تحانت=راح السعف والشوك والجذع مسنود
دنياك ذي من يوم كنا وكانت=هذا بها نازل وهذاك مفقود
دنيا العنا ياما بالأجواد خانت=وياما عليهم سلت السيف مجرود
فكرت فيها لين عني توارت=أيام تتبعهن لياليهن السود
والمؤمن اللي يسهر الليل قانت=يدعي ويطلب خالقه مذري النود
يغفر له ذنوبٍ على القلب رانت=لا صبح وحيد الدار في مرتع الدود
معجب نخيلان =
الضعيني المحمدي=
---------------------------------------=
قال حمود السكراني=
-----------------------------------------=
لجت ودارت بالفكر واستكانت=وتجمعت عندي مصادير وورود
وطاعت جزيلات القوافي ولانت=وسارت معانيها على القاف مردود
ياحي من نادى القوافي ودانت=من عادتك يالعود مطلوبك الكود
دنياك لوزانت يامعجب وشانت=اللي ان كتب باللوح ماعنه مردود
أدري تعاني وكم من الناس عانت=وعمر البشر محدود والحوض مورود
ياصاحبي لو سالف الوقت زانت=ماصار بالحاضر سلاطين وجنود
وياصاحبي لو للذي فات صانت=ماشفت منزل شامخ الذكر مهدود
ياكثر ماكانت ولاتقل كانت=وياكثر ماقفوا جماعات ووفود
وكانك عجزت وفيك الأقدام خانت=ماهو غريب مرافق العود للعود
المشكلة كان ساعة الصفر حانت=وحنا نمنيها على مكسب الفود
يالله تجعلها لياشئت و اآنت=مابين هالركنين ياركوع ياسجود