[احمد الجريفاني]

زرعتي بساتين الغلى وسط معلوقـي = الين ازهرت حب وتعابيـر واشواقـي
وشلتي خيوط الحسد من داخل الموقي = لما شفت عدواني حبيبين واصداقـي
وجاء ذوقك المرهف على منتهى ذوقي = متى يجتمع بالكـون حلـوٍ وذواقـي
وعطيتيني الوقت الذي كنت مسروقي = لما صرتي احساسي وناسي وترياقي
وشلتي هموم معلقاتٍ علـى طوقـي = لما اصبحت حرِّ مثل مطلوق الاسباقي
رتقتي بعطفك خافـقٍ كـان مفتوقـي = بليا ألم سرتي إلـى داخـل اعماقـي
وسرى حبك الدافي كما الدم بعروقـي = عسى ما يجي يومٍ تحسيـن بفراقـي
وهبتيني اضعاف على كامل حقوقـي = وش اجزيك يا حلم سكنتـي بخفّاقـي؟
احبك بروحي وانتي الروح والشوقـي؟= أو اهديك قلبي وانتي المالـك الباقـي؟
ملكتي بدوي خايلك غيم وبروقي= على اول حلول الوسم والبدو تشتاقي
لريح المطر يامزنة همللـت فوقـي = فديتك بكل اللي ملكتـه مـن نياقـي
اغني لك الحاني على كـل طاروقـي =و اكحّل عيون الشعر في حبك الراقـي