ماريّة فيني من الوقت منهاش=وجوا ضميري شي ينهش نهاشه
ينهش وهشش ماانبنى داخل الجاش=ويقرش قريش المعتجل في قراشه
جوا ضميري له وشيش وخرفاش=سوى بريضان الضماير لباشه
لانيب درويش ولانيب قراش=وبالزوم الشين محلا بلاشه
اللي يجي من ماش يمشي على ماش=وراع المعاش الله يكثر معاشه
وكل على ماراد للرزق يعتاش=وعمر كتبه الله على العبد عاشه
ومن لاطمع للعز والجود ماعاش=ماعاش لو انه وزير وباشه
مما جرى راسي مشوش ومنداش=مما جرا بالوقت فيه اندواشه
وياشوش راسي شوشة الجمس لاشاش=في يد منهو لايع الفقر ناشه
حده زمان الفقر عالفقر وانحاش=ولاشاف من جور الليالي بشاشه
هواه في جمس وبندق ورشاش=ويعطي عضام اللي يحده دشاشه
الشين مردوده على لحية الاش=حيثه لها لاجت يفرش فراشه
ولا عزيز النفس للعز شواش=يرخص لعكفان الشوارب كباشه
نوب تجي بالدين واحيان بالكاش=ونوب يجي وسط الامور انعراشه
السم له حاوي وللشوك منقاش=واللي يحوش العز باليد حاشه
احد يحوش السمر والاخر قحاش=كل من الدنيا يقحوش قحاشه
والله على روض ينغوش تنغواش=راع الدبش وسطه يضيع دباشه
يطيش عشبه طيشة الموج لاطاش= واطش به خافق يطشّش طشاشه
والجو شاتي وابتدى الوبل برشاش=وصارت علينا من كرمها غباشه