تطعن شعوري الف مره ومره=بحدَ الحروف اللي نبشت كل مخفي
واطلق سراح البوح للجرح واشره=عليك يامن يطربك زود نزفي
وين انت يومٍ للأحاسيس جمره=بعوج الضلوع اللي لها الحب منفي
لا فزَ طرفك قلت لله دره=يقرا ضميري قبل يرتد طرفي
وان صد بثياب الجفا متَ حسره=واقول يالله زاير الليل يلفي
تزعل وانا اللي مهجتي منك حره=وارفع شراع الوصل لك رغم انفي
حبك غزى في خافقي كل ذره=نصفٍ أسير وبين الاجداث نصفِ
نصبت من ورد الغلا لك مجره=وقدمت لك روحي على اطراف كفي
واهديتيني يا جاحد الود زهره=مابين بيض ردونها الموت يغفي
اشمَها وتصهل من الصدر زفره=تكتب على وجه السما بس يكفي
الطعنة لامن جتَ على حين غره=ينهدَ ركن العمر لو كان صلفي
مات الهوى فيكم ولا طلت شعره=منكم و منكم يالغظي شاب حرفي
كلمة احبك بالشفا حيل مره=لا صار سم الغدر بالعرق يطفي
لا تزعج احساسك ترى راح وطره=وراسك من اضغاث المعاذير معفي
ياصاحبي مايوجع القلب كره=مادام من غدرك تلقيت حتفي