من عصر مزن الصيف يردم سنودي=قالوا لي ابشر بالمطر قلت ياليت
لي كم شهر ما اوحيت قصف الرعودي=وبالعين كم لي عن سنا البرق ما اغضيت
ويفز قلبي كلما هب نودي=ليت ال مهب النود حسبة وتوقيت
وللصمت مثل الهرج توجد حدودي=وتوضع غرامة كلما اسكت وابطيت
ويجعل نظامه من ثلاثة بنودي=ولجنة ال تطبيق النظام ان تعديت
اولهن من اللي بصدرك تجودي=وتشرح مسراتك وما منه عانيت
تفرح صديق ويستشيط الحسودي=وترتاح لامنك بتاليه ونيت
وحكمة وعلم وكل مافيه فودي=ومدح الرجال الطيبين العناتيت
من عرفهم تكسب معزة وزودي=ماهيب معرفة السراد السرابت
وثانيه لو انك رغبت الركودي=ما احدٍخلع بابٍ بسده تواريت
وثالث شروطه كان صدق امحدودي=يلزمك لو مع كل طلعت شهر بيت
ويبدولي اني بعد هذا باعودي=ال ذكر من طيفه يجي كلما اغفيت
اللي قتلني بالجفا والصدودي=واللي من اجله عقب ماشبت غنيت
من كثر ما اكتب عنه فترن عضودي=ومن كثر ما يطري تزود التناهيت
وردٍتحت عكشن مضاليل سودِي=وصافٍ مع الظلما يكفي عن الليت
صحيح منه اليوم كثرت الهودي=ولا اظن يرجع مامضى لو تمنيت